वंगु सरकारं यागु नेपाल प्रहरीया अतिरिक्त महानिरीक्षक (एआईजी) या सरुवा गृह मन्त्रालयं रोके यागु दु।

गृहमन्त्री बालकृष्ण खाँडं वंगु सरकारं यागु एआईजी सरुवा कार्यान्वयन मयायेत प्रहरी प्रधान कार्यालययात निर्देशन बिगु दु धका मन्त्रालयया स्रोतं धागु दु।

मन्त्रालयं एआईजीपिनिगु सरुवा मयायेत निर्देशन बिगु दु । केपी शर्मा ओली नेतृत्वया मन्त्रिपरिषदं असार २४ गते च्वंगु बैठकं एआईजीपिनिगु सरुवा यागु खः।

उपत्यका प्रहरी कार्यालय, रानीपोखरीया प्रमुख हरिबहादुर पाल कार्य विभागय् छ्वंगु दु। तर प्रहरी महानिरीक्षक शैलेश थापां थःम्हेसिया दयकूगु आचारसंहिता विपरित दँच्छि मदयक वयात सरूवा यागुलि आलोचना जुगु खः।

बालुवाटार पालं विपक्षी गठनबन्धनयात ग्वाहालि यागु  आरोप बिगु खः । पालया थासय् वया हे ब्याची प्रद्युम्न कार्कीया सरूवा यागु खः । प्रशासन विभागया निरजबहादुर शाहीयात अपराध अनुसन्धान विभागया जिम्मा बिगु खः।

अपराध अनुसन्धान विभागय् एआईजी विश्वराज पोखरेल प्रहरी प्रशिक्षण प्रतिष्ठान छ्वःगु दु।

Categorized in राष्ट्रिय