राष्ट्रपति कार्यालयं अस्वीकार यायेवं नवनियुक्त महान्यायाधिवक्ता खम्मबहादुर खातीयात सर्वोच्च अदालतय् शपथग्रहण याकूगु दु।

राष्ट्रपति कार्यालय प्रधानन्यायाधीशं शपथ ग्रहण याकेगु धइगु संवैधानिक पदाधिकारीया हकय् सर्वोच्च अदालतय् हे शपथ याकेगु धइगु निर्णय यायेवं शपथ ग्रहण याकेगु थाय्या परम्परागत ह्यूपाः वंगु दु। आःतक नियुक्त महान्यायाधिवक्तापिन्स राष्ट्रपति कार्यालय, शीतल निवासय् राष्ट्रपतिया उपस्थितिइ प्रधानन्यायाधीशपाखे शपथ ग्रहण याकेगु परम्परा दु।

निवर्तमान महान्यायाधिवक्ता रमेश बडालयात न वंगु चैतय् राष्ट्रपति कार्यालयय् शपथ याकूगु खः। नेपाःया संविधान यागु धारा १५७ य् प्रधानमन्त्रीया सिफारिसय् राष्ट्रपतिं महान्यायाधिवक्ता नियुक्त यायेगु व्यवस्था दु। तर शपथ धासा प्रधानन्यायाधीश नाप कायेगु कानूनी व्यवस्थाया कारण थ्व स्वया न्ह्यःया अभ्यासय् राष्ट्रपतिया उपस्थितिइ राष्ट्रपति कार्यालय शीतल निवासय् हे शपथ कायेगु प्रचलन दुगु खः।

राष्ट्रपति कार्यालयय् शपथ मयासा संवैधानिक व्यवस्थाया कारण महान्यायाधिवक्ता नियुक्तिपत्र कायेगु लागि राष्ट्रपति कार्यालय हे वनेमाः।

Categorized in राष्ट्रिय