जिं म्हस्यूम्ह एकाराम दाइ
नःलि बज्राचार्य | दिल्लाथ्व अष्टमी ११४१,साउन २ सनिवाः
जिं एकाराम दाइयात गुगु इलं निसें म्हसिल, दँ हे क्वछिनाः ला धाय्मफु तर, जि स्कूल ब्वनाच्वनागु इलंनिसें हे एकाराम दाइ जिमिगु पसः सफू धुकुतिइ झायादी । अप्वः यानाः सनिलया न्याताः लिपा वय्कः थःगु ज्याकुथिया ज्या सिधय्काः झायादी । पसलय् बहनी जुलकि न्ह्याबलें भाषाह्यमिनिसें राजनैतीक मनूतय्गु नं नापलाय्गु थाय् जुयाच्वंगु जिमिगु पसलय् वय्क नं ४६ सालया जन आन्दोलन स्वया न्हापांनिसें हे न्हिं न्हिं धइथें झायादी ।
वि.स २०४९÷५० सालपाखे त्रि.वि.वि. महाराजगञ्ज क्याम्पस बनाच्वनागू इलय् उगु क्याम्पसया सुसाः खलःया न्वकू जि । उबलय् हरेक क्याम्पसया साहित्य पालाःतय्सं दँपौ पिकाय्गुनिसें छुं नं छुं छगू धेंधें बल्लाः कासा यानाच्वंगु । जिमिगु खलःपाखें छुं हे याय् मफयाच्वंगु । सुनां नं मयाःगु छुं याये माः थें जिमित ताल । किपाः च्वज्या धेंधें बल्लाः कासा सुनां नं मयानिगु जुल । थ्व कासा म्ह्वः इलय् हे याय् फइ थें जिमित ताल । चिकित्सा शास्त्रया विद्यार्थीत जूगुलिं उखेथुखे ब्वाय्त ई चुलाके थाकु । उकिसनं आपाः जनशक्ति नं मदु ।
छगू जक खलकं याय् थाकुइ थें च्वनाः नर्सिङ क्याम्पसया लिधंसा पुचःनाप जिमिस खँ ब्याका । उबलय् लिधंसा पुचलय लता बज्राचार्य, पूर्णिमा डंगोलपिनिगु ज्यासना पुचः दुगु । जिपिं सकसियां खँ मिलय् जुल । उगु इलय् एकाराम दाइ नं चिकित्सा शास्त्र अध्ययन संस्थानया हे छगू शिक्षण सामग्री प्रकाशन याइगु युनिट Health Learning Material Centre नाप आवद्ध जुयाच्वना दीगु । उगु संस्थां पिकाइगु सफूया देबः किपाःत च्वय्गु ज्या नं एकाराम दाई नं हे यानाच्वनादीगु । अथे जुयःा एकाराम दाइनाप जिमिगु स्वापू भाषा ख्यःयालिसें क्याम्पसपाखें नं निखेरं स्वात । वय्कलं जिमित उगु ज्याझ्वः याय्त थः हे पुचःया दुजः थें यानाः ग्वाहालि यानादिल । ग्वसाः ग्वय्गु, विज्ञापन, जजÞया व्यवस्था, विभिन्न व्यक्तिपिंनाप आर्थिक नापं सामग्री ज्वलंत ग्वाहालि चूलाकेत जिपिं स्वयां नं वय्क यक्व ब्वाँय् जुयादिल । ई दुसां मदुसां ई चूलाकाः वय्कल जिमित ग्वाहालि यानादिल । न्हापांग अन्तर क्याम्पस किपाः च्वज्या कासा सफलतापूर्वक क्वचाय्केत वय्कलं जिमित थुकथं यक्व हे ग्वाहालि यानादिल । गुबले हे म्हाः मधाय्गु न्ह्याबलें मुसुकाःगु वय्कःया ख्वाल सकसिया लुमना हे च्वनी ।
वय्कःनाप स्वाःगु छगू जिं ल्वःमंकेमफूगु खँ वय्कःया इहिपाःया खः । वय्कःया इहिपाःबलय जिमि बा नातिबज्रयात नं भ्वय् जक मखु लँ स्वःवनेततकं सःताहयादिल । सुथय् ९ ताः मजूनिबलय् हे लँ स्वः वनेगु ई तयातःगुलिं बा याकनं हे छेँय् नं पिहांझाल । बा पिहांझालकि क्याम्पस वनेम्वाःबलय् पसः चाय्केगुनिसें पसलय् च्वनेगु ज्या जिगु । जि जा नयाः पस चाय्काः पसलय् च्वंचना । जिगु बिचालय् बा न्हिनसिया स्वताः प्यताः इलय् लिथ्यनी धैगु, बा उगु इलय् लिहां मझाः । मां ब्वनेकुथिइ आखः ब्वंकाः लिहां झाय्धुंकल, बा लिहां मझाः । छम्ह निम्ह वय्कः नापं हे लँ स्वःझाःपि न्हापां हे लिहां झाय्धुंकल ।
ई बिनां तुं वन । द्यः ख्युँसे च्वनेधुंकल, बा लिहां मझाःनि । उगु इलय् मोवाइल फोन नं दुगु मखुनि । गन फोन याय्गु ? च्याताः ति जूबलय ध्वारारारा वयाः मोटरसाइकल छगः पसः न्ह्यःने दिके हल । मोटरसाइकलया ल्यूने बा च्वनाः झाःगु खनी । बा दंग जुयाः न्हिलाः मोटरसाइकलं कुहां झायादिल । मख्ख जुयाः थः गुर्जु जुयाः एकाराम दाईया ब्याहा यानाबियागु खँ कनादिल । लँ स्वःवंम्ह जिमि बाः गुर्जु जुयाः लिहांझाःगुलिं लिबाःगु खनी । बाः गुर्जु खःसां गुर्ज ज्या यानादीम्ह नं मखु, सःम्ह नं मखु । जिपिं वातां जुल । जूगु गथे खनी धाःसा एकाराम दाइपिनि गुर्जु वखुन्हु छुं विशेष कारणं अचानक थ्यंक मझाल खदी । गुर्जु मदयाः संकट, जुल । लँ स्वः वयाच्वंम्ह नाति बज्र गुर्जुपाखे सकसियां मिखा लात । मसः, म्हां म्हां धाय्क धाय्क वय्कःपिन्सं बाःयात गुर्जुया कर्म खंका बियादिल । बा नं थःगु जीवनया न्हापांगु खुसी गुर्जु जुयाः एकाराम दाइया इहिपाः याकाः लिहांझाल । थ्व एकाराम दाईनाप स्वाःगु न्ह्यइपूगु गुबलें ल्वःमके मफइगु घटना जुयाबिल ।
महासत्व किपा हना बाखं (कमिक्स) छापय् याय्ग सिलसिलाय् नं वय्कः बायात नापलाय्त पसलय् यक्व हे झायाद्यू । वय्कलं जिं क्याम्पस ब्वनाच्वनागु इलय् वातावरण संरक्षण सम्बन्धी यक्व ह् सामग्री चूलाका ग्वाहालि यानादीगु दु । उगु इलय् वय्कः IUCN (International Union for Conservation of Nature) धैगु संस्थाय् ज्या यानाच्वनादीगु खः ।
वय्कः पसलय् झायादीबलय् भाषिक उत्थान, संस्कृति म्हसिका व संरक्षण, ज्यापु जातिया विशेषता थुज्वःगु खँय् थम्हं स्यूगु व थम्हं अध्ययन यानागु खँत धयादी । वय्कया पहलय् मरु सतलय् नेवाः संस्कृतिनाप स्वाःगु किपाः ब्वज्या जूगु खँ नं सुनां ल्वःमंके फइमखु । वय्क मदयाः नेवाः जाति, भाषा व संस्कृतिया ख्यलय तःधंगु ह्याकिं वंगु दु । वय्कःया सुखावति भुवनस वास लाय्मा ।
