२०७८ श्रावण १७, आइतबार

इलय्ब्यलय् थःगु ख्वाः थम्हं स्वय्माः

काजी | दिल्लाथ्व द्धादशी ११४१,साउन ६ बुधवाः

मार्क जुकरबर्गं शुरुइ फेसम्यास न्ह्याकूगु खः । गर्लफ्रेन्डं धोका बिल धकाः वयात ब्वः बीत व मेपिन्त नं ब्वः बीकेत थः ब्वनाच्वनागु युनिभर्सिटी दुनेया पासापिन्सं नं स्वय्जीगु, च्वय्जीगु कथं जुकरवर्गं फेसम्यास न्ह्याकल । लिपा वनाः युनिभर्सिटीं पिहांवयाः विश्वव्यापी जूबलय् थ्व हे फेसम्यास फेसबुक जूवन । फेसम्यासया नां ला हिल तर कम से कम नेवाःतय्गु नितिं नं फेसम्यासया उद्देश्य मह्यूगु खनेदत, ब्वः बीगु । फेसबुक स्वल धाःसा जुकरवर्गं थः गर्लफ्रेन्डयात ब्वः बीगु नितिं दय्कल, थ्व ब्वः बीगु दबू हे खः धकाः झीसं थौंतक नं कयाच्वं थें आपाःसित हे ताः ।
 
झीगु जःखः यक्व हे मनूत कोरोना संक्रमणया हुनिं मन्त अले मदुपिनि थःथिति, पासाभाईपिन्सं थः मदुम्ह मनूयात लुमंकाः श्रद्धान्जली तल । ‘फेसबुकय् श्रद्धान्जली तय् हे माःगु ला, न्हापा फेसबुक मदुबलय् श्रद्धान्जली धइगु हे सुनां मब्यूगु खःला ?’ गुलिसियां निषेधाज्ञाया अवस्थाय् छेँय् च्वँच्वं म्हाइपुयाच्वंबलय् म्ये हालाः शेयर यात । एक्टिङय् इन्ट्रेस्ट दुपिनि टिकटकय् एक्टिङ यानाः भिडियो शेयर यानाच्वन । ‘मनूतय् थपाय्सकं दुःख सियाच्वंबलय् छिमि थथे न्ह्यइपुकाः भिडियो शेयर यानाच्वने फुगु ला ?’ प्रतिक्रिया थथे हे वल नि मखुला ।
 
अथे हे कुकिङय् मन क्वसाःपिनि न्हून्हूगु नसा ज्वलं ट्राइ यात । कलाकारतय्सं तकं छेँय् च्वनाच्वंगु इलय् थःगु पाक कला न्ह्यब्वल । थुकी छु प्रतिक्रिया वल ले ? ‘गुलिसिया नय् मखनाः दुःख जुइ, छिमि छु उगुं थुगु नय्गु दय्काः ब्वयाच्वनागु ?’
 
दुःखया इलय् न्ह्यइपूगु खँ शेयर याय्मजिल, फेसबुकया वालय् नय्गु खँ ल्हाय् मजिल । उलि जक मखु, दुःखया इलय् न्ह्यइपूगु खँ ल्हाय्मजिल धाधां थः सुं मनू मन्त धाःसा उमित श्रद्धान्जली तक नं बी मन्त । आः फेसबुकय् तय्ज्यूगु छु ले ? 
 
खँ स्वानायंके, वर्तमान परिवेशलिसे । वर्तमान परिवेशय् क्वथा बालं मब्यूगु खँयात कयाः जूगु ल्वापुं तःधंगु रुप काःगु दु । व्यक्तिगत कचवंया खँयात जातीय रङ्ग बियाः राष्ट्रिय मुद्दा हे दय्काब्यूगु दु । थःत जातीय विभेद यात धकाः सः तयाच्वंम्ह रुपा सुनार सहि खः वा गलत व थःथःगु बिचाः दय्केगुलिइ न्ह्याम्हं स्वतन्त्र । तर सामाजिक संजालय् वय्कःया विरोधय् गज्याःगु खँग्वःत खनेदयाच्वन ? आम नेवाः ला छखे तय्, गुलिखे पत्रकार धाय्का च्वंपिन्सं हे जातया हे नां कयाः, अझ उलि जक ला मिस्तय् अङ्गया नां कयाः तकं मेगु पक्षयात ब्वः बियाच्वंगु खनेदत ।
 
छु थ्व धइगु झीगु सभ्यता खःला ? इलय्ब्यलय् थःगु ख्वाः छकः थम्हं स्वय्माः, ख्वालय् छुं किनाच्वंगु दुसा हुयाछ्वय्त ग्वाहालि जुइ ।