प्रधानमन्त्री निवास बालुवाटारय् च्वंगु सत्ता गठबन्धनया बैठकं मन्त्रालय बाँडफाँटया जिम्मा शीर्ष नेतापिन्त बिगु दु।

एमालेया माधव नेपाल पक्षतक सहभागी जुगु उगु बैठकय् मन्त्रालय टुग्ये यायेगु जिम्मा शीर्ष नेतापिन्त बिइगु निर्णय यागु दु।

बैठकं सरकारया न्यूनतम साझा कार्यक्रम याकन हे टुंग्ये यायेत कांग्रेस महामन्त्री पूर्णबहादुर खड्का नेतृत्वया कार्यदलयात निर्देशन समेत बिगु दु। मन्त्रि परिषदयात पूर्णता बिइत व सरकारया न्यूनतम साझा कार्यक्रमबारे छलफल यायेत बैठक च्वंगु खः। बैठकय् प्रधानमन्त्री शेरबहादुर देउवा नाप वरिष्ठ नेता रामचन्द्र पौडेल, महामन्त्री पूर्णबहादुर खड्का व कृष्णप्रसाद सिटौला नाप माओवादी केन्द्रया अध्यक्ष प्रचण्ड व नेता नारायणकाजी श्रेष्ठपि सहभागी जूगु खः।

जसपापाखे अध्यक्ष उपेन्द्र यादव, डा. बाबुराम भट्टराई व अशोक राई नाप जनमोर्चापाखे अध्यक्ष चित्रबहादुर केसी व दुर्गा पौडेल सहभागी जूगु खः। सत्ता गठबन्धनया बैठकय् एमालेयो माधव नेपाल समूहया प्रतिनिधित्व डा. विजय पौडेल न यागु खः।

Categorized in राष्ट्रिय