येँ महानगरपालिकाया मेयर विद्यासुन्दर शाक्यं येँ देय्या संस्कृति, सम्पदात संरक्षण यायेगु झ्वलय् छुं गुथि खलःया थःगु जग्गा दुसा अन महानगरपालिकां सांस्कृतिक छेँ दना बीगु खँ कनादीगु दु।

येँ मनपा २१ वडास्थित तःबहालय् थीथी द्यःपिं व तुंफः पुनर्निर्माण लिपा मंगलवाः उलेज्या यासें वय्कलं धयादिल, ‘संस्कृति सम्पदा संरक्षणया ज्याय् येँ महानगरपालिकां न्ह्याकाच्वंगु ज्याय् हे ग्वाहालि यायेत आः बागमती प्रदेश सरकार नं न्ह्याः वःगु दु ।

आः येँय् सांस्कृतिक बाजं न्यायेगु लागिं बागमती प्देश सरकारं ३ करोड दां फ्याना बिउगु दु । थुकिया लागि प्रदेश सरकार लिसें थुकी पहल यानादीपिं सकलें प्रदेशसभा सदस्यपिंत सुभाय् देछानाच्वना ।’कामपा २१ वडा ज्याकू व स्थानीय तःबहाः पुचःया मंकाः ग्वसालय् अन तुंफः व थीथी द्यः पुनस्र्थापना याःगु खः ।

महानगरपालिकाया थज्याःगु ग्वाहालिं यानाः येँया गुलिखे गुथि खलःया दुजःत जानाः जग्गा न्यायेगु शुरु जुयाच्वंगु व अन महानगरपालिकां सांस्कृतिक प्रयोजनया छेँ दना बीगु खँ वय्कलं कनादिल । वय्कलं धयादिल, ‘न्हापा न्हापा गुथित थःपिंसं हे यानाच्वंगु गुलिखे सांस्कृतिक ज्यााय जिम्मा आः स्थानीय सरकारं हे कयाः यानाच्वंगु दु । थनया संस्कृति सम्पदात संरक्षणयात येँ महानगरपालिकां अपनत्व ग्रहण यासें थ्व ज्या याःगु खः।’

येँ महानगरपालिकां यानाच्वंगु छुं ज्यायात अदालतं पना बिउगु खँय् दुःख प्वंकुसें वय्कलं धयादिल, ‘यदि सर्वोच्चं पना मबिउगु खःसा थ्वहे वडाया लगं त्वालय् लगं पार्क दयेके सिधयेधुंकीगु जुइ । जिमिसं थ्व लगं चोकयात असन चोक, इन्द्रचोक थें आकर्षक चोक दयेकेगु कुतः यानाच्वनागु दु ।’

लगंया स्थानीयवासीया लागि दयेके त्यनागु लगं पार्कयात छम्ह मनूया उजुरीया भरय् पना बिउगु खँ कँसें वय्कलं आः कोरोनाया कारण क्यनाः थ्व मुद्दाया पेशी तकं मतसे पनाच्वंगु खँ नं कनादिल ।

Categorized in राष्ट्रिय