येँ महानगरया ६५ क्वःगु कार्यपालिका बैठक क्वचाल येँ महानगरया ६५ क्वंगु कार्यपालिका बैठक सम्पन्न जुगु दु। महानगरया मेयर विद्यासुन्दर शाक्यया अध्यक्षताय् जुगु उगु बैठकय् उपप्रमुख हरिप्रभा खड्गी श्रेष्ठया संयोजकत्वय न्याम्ह सदस्यीय ‘मध्यम दूरीका यातायात सञ्चालन सम्बन्धी अध्ययन कार्यदल’ गठन यागु दु।

खुल्ला मञ्चपाखे बसपार्क हटे यागु बैशाख १६ पछि महानगरं सिटी यातायातयात ‘पिक एण्ड ड्रप’ यायेत व मध्यम दूरीया यातायातयात न्हुगु बसपार्कपाखे सञ्चालन यायेत धागु खः। महानगरं थुगु व्यवस्था कार्यान्वयनय् वयेव मध्यम दुरीया यातायात व्यवसायी न न्हुगु बसपार्क अपायक जुगु धासे मेगु व्यवस्था मजुतले न्हापागु थासय् यातायात सञ्चालन यायेत माग याना वयाच्वंगु खः। थुगु थासं मेगु थासय् यातायात लितः हये मफइगुलि मध्यम दुरीया यातायात लागि विकल्प अध्ययन यायेत कार्यदल गठन यानागु धका बैठकय् मेयर विद्यासुन्दर शाक्यं जानकारी बिगु खः। गुगु विकल्पया रुपय् व्यवसायीपिन्स मेगु विकल्प तःगु खः।

उगु विकल्पय् अध्ययन यायेगु जुइ। मेयर शाक्यं धागु दु। नेपाल यातायात व्यवसायी राष्ट्रिय महासंघं मेगु व्यवस्था मजूतलेया लागि खुल्ला मञ्चय् साविकबमोजिम बसपार्कया रुपय् प्रयोगया लागि यागु माग निवेदन सम्बन्धी विषय छलफल यासे उगु निर्णय यागु खः।  उगु समितिया सदस्यपि वडा २६ या अध्यक्ष ख्याम तिवारी, वडा ३२ या अध्यक्ष नवराज पराजुली, सहरी सुव्यवस्था विभागया प्रमुख ध्रुव काफ्ले व नगर प्रहरी बलया प्रमुख नगर प्रहरी उपरीक्षक धनपति सापकोटा च्वनादीगु खः। समितियात ट्राफिक प्रहरी व यातायात व्यवस्था विभागपि नापं सरोकारवाला निकायनाप छलफल याना सुझाव बिइत न्ह्यन्हुया ई बिगु दु।

अथेहे बैठकय् मेयर शाक्यं संयुक्त एम्बुलेन्स चालक संघ जुगु कोविडया इलय सहकार्यया विषय जानकारी यायेत सहरी स्वास्थ्य विभागया प्रमुख हरि कुँवरयात व खुल्ला मञ्चपाखे अस्थायी बसपार्क हटेयागु ‘पिक एण्ड ड्रप’ कार्यक्रमया विषय व यातायात व्यवसायपि नाप जुगु छलफलया विषय जानकारी यायेत नगर प्रहरी बलया प्रमुख नगर प्रहरी उपरीक्षक धनपति सापकोटायात ई बिगु खः।

थुगु विषय छलफल विविधय तगु खः। उगु बैठकय् १६ गु प्रस्ताव व विविधय् खुगु विषय तःगु खः। खोप कार्यक्रमया कारण कार्यपालिका सदस्यपि केन्द्र व्यवस्थापनय् वनेमागुलि प्रस्ताव मध्ये ‘इन्द्रजात्रा पर्व संरक्षण अक्षय कोष सञ्चालन कार्यविधि — ०७८’ या मस्यौदा जक पेश जुगु खः।

Categorized in राष्ट्रिय