नेकपा एमालेया अध्यक्ष केपी शर्मा ओली पक्षीय नेतापि जक दुथ्यागु स्थायी कमिटी बैठकं विधान संशोधन प्रस्ताव पारित यागु दु।

तुलसीलाल स्मृति प्रतिष्ठान, च्यासलय् थौं सोमबाः च्वंगु स्थायी कमिटी बैठकं केन्द्रीय कमिटी बैठकय् पेश यागु प्रस्ताव पारित यागु दु, उकिइ अध्यक्ष व महासचिव बाहेक दक्को पदाधिकारी मनोनित यायेगु उल्लेख दु।

‘अध्यक्ष व महासचिव बाहेक मेमेगु पद हलपाखे निर्वाचित मयायेगु प्रस्ताव हःगु दु। थुगु प्रस्ताव केन्द्रीय कमिटीं पारित यातकि छलफलय् खुला जुइ,’ धका छम्ह नेतां धागुदु। एमाले न च्याक्वः महाधिवेशनया हलपाखे निर्वाचित बहुपदीय संरचना अभ्यास याना वयाच्वंगु खः।

च्याक्वंगु व गुक्वंगु महाधिवेशनं दक्को पदाधिकारी हलपाखे निर्वाचित जूगु खः। तर पार्टीया वरिष्ठ नेता माधवकुमार नेपाल समूह न एकताया कुतः जुयाच्वंगु इलय् यकःति ढगं विधान अधिवेशन यायेगु तयारीइ दुगु ओली पक्षं अध्यक्ष व महासचिव बाहेक मेमेगु पद लिपा जक मनोनित यायेगु प्रस्ताव न्ह्यने हःगु खः। विधान संशोधन याना पार्टीपाखे वरिष्ठ नेता मतयेगु प्रस्ताव न्ह्यने हःगु खः। बहुकेन्द्र निर्माण जुगुलि वरिष्ठ नेताया पद हे मतयेगु प्रस्ताव केन्द्रीय कमिटी बैठकय् तःगु खः। निवर्तमान अध्यक्ष पार्टीया वरिष्ठ नेता तयेगु प्रचलन एमालेय् दु। तर च्याक्वंगु महाधिवशेन लिपा माधवकुमार नेपाल व गुक्वःगु महाधिवेशनलिपा झलनाथ खनाल वरिष्ठ नेता जुगु खः।

तर च्याक्वःगु पाखे अध्यक्षय् पराजित ओली व गुक्वंगु पाखे पराजित माधव नेपालयात वरिष्ठ नेताय् मनोनित यागु खः। अथेहे पदाधिकारी ल्याः घटे यायेगु प्रस्ताव न हःगु खः। एमालेय् छम्ह अध्यक्ष, छम्ह वरिष्ठ नेता, न्याम्ह उपाध्यक्ष, छम्ह महासचिव व न्याम्ह सचिव दइगु व्यवस्था यागु खः। गुक्वःगु महाधिवेशन लिपा देशय् संघीयता संरचना वंगुलि अञ्चल समन्वय कमिटीया थासय् प्रदेश संगठन कमिटी प्रस्ताव यागु खः।

Categorized in राजनीति