नेपालभाषा ब्वंकेत माग
गुंलाथ्व द्धितीया ११४१, साउन २६ मंगलवाः
येँया रत्न राज्यलक्ष्मी क्याम्पसय् स्नातकोत्तर तहलय् नेपालभाषा ब्वंकेत माग याःगु दु ।
नेवाः विद्यार्थी युनियनया न्ह्यलुवाय् क्याम्पस प्रमुख जीवनधर ज्ञवाली अले त्रिभुवन विश्वविद्यालयया डिन ज्याकूथी नेपालभाषा ब्वंकेत माग यानाः ज्ञापनपौ ब्यूगु दु ।
रत्न राज्यलक्ष्मी क्याम्पसय्न्हापान्हापा मानविकी संकाय अन्तर्गत नेपालभाषा ब्वंकीगु यानावःगु खः । तर थौंकन्हय् आखः ब्वनीपिं विद्यार्थीत मदुगु धकाः क्याम्पसं विषय मब्वंकेगु यानाहःगुलिइ नेवाः विद्यार्थीतय्सं आखः ब्वंनीपिं विद्यार्थीत न मुंकाब्यूगु दु ।
नेवाः विद्यार्थी युनियनया नायः रिदेन महर्जन, मूछ्यान्जे प्रशान्त डंगोल, दुजःपिं सुरज तन्डुकार, सुनिल महर्जन, नेवाः न्ह्यलुवा विद्या श्रेष्ठलिसेयापिन्सं ज्ञापनपौ ब्यूगु खः ।
थ्वहे पुचलं येँ महानगरपालिकाया मेयर विद्यासुन्दर शाक्ययात तकं नेपालभाषा ब्वंकेमाःगु विषय ध्यानाकर्षण याकूगु दु । २०७२ सालय् जारी जूगु नेपाःया संविधानं सुनिश्चित याःगु मातृभासं आखः ब्वनेदयेमाःगु अधिकार सुनिश्चित यायेमाःगु धकाः ज्ञापन पतिइ उल्लेख यानातःगु दु ।
थ्वहे क्याम्पसय् स्नातक तहलय् नेपालभाषा न ब्वंकाच्वंगु दु । थौंकन्हय् यलध्वाखाया नेपालभाषा केन्द्रिय विभागय् न स्नातकोत्तर तहलय् नेपालभाषा ब्वनेगु व्यवस्था दु ।
Categorized in राष्ट्रिय
