ब्वमिपिन्त नं खोप बिइगु तयारी जुयाच्वंगु दु : स्वास्थ्य राज्यमन्त्री श्रेष्ठ
गुंलाथ्व चतुर्थी ११४१,साउन २८ बिहीवाः
स्वास्थ्य लिसें जनसंख्या राज्यमन्त्री उमेश श्रेष्ठं असोज मसान्त दुने थप छगू क्वति २गू लखः व माघ मसान्त दुने ३गू क्वति खोप प्राप्त जुइगु जानकारी बियादिगु दु ।
प्रतिनिधिसभाय् थौंया मुँज्याय् न्ववासें वय्कलं आःतक १गू क्वति ८गू लखः ६०द्वः सछि व ७०गू मात्रा जक कोभिडया खोप चूलागु जानकारी बियादिल ।
राज्यमन्त्री श्रेष्ठं नेपाली जनतायात मुक्कं ५गू क्वति ५०गू लखः खोप माःगु धयादिसें आः न्हियान्हिथं १गू लख ५०द्वः लिसें २गू लख तक्क खोप बियाच्वनागु धयादिल ।
छवा निसें कोभिड १९ या संक्रमणदर अप्वःगु हुनिं दक्वसित स्वास्थ्य मापदण्ड नालाकायेत नं वय्कलं इनाप यानादिल ।
बन्द जुयाच्वंगु ब्वनेकूथिइ शैक्षिक ज्याझ्व न्ह्याकेत ब्वंमिपिन्त खोप उपलब्ध यायेगु तयारी कथं खोप हयेगु गृहकार्य न्ह्याकागु नं वय्कलं धयादिल ।
Categorized in राष्ट्रिय
