येँ महानगरपालिकाया मेयर विद्यासुन्दर शाक्यं सामूदायिक व सरकारी अस्पतालनाप सहकार्ययात प्राथमिकताय् न्ह्या वनाच्वनागु दु।

थौं येँ १५ वडा डल्लुइ च्वंगु सामूदायिक स्वास्थ्य सेवा परिषदयात ६ लाखया चेक हस्तान्तरण ज्याझ्वलय् न्ववायेगु झ्वलय् अथे धयादीगु खः। ‘महानगरय् च्वंपिनिगु मखु देयन्यक च्वपिन्त सहुलीयत दरं गुणस्तरीय स्वास्थ्य सेवा काये फय्मा धका महानगरपालिका दुने सामूदायिक व सरकारी अस्पतालनाप सहकार्ययात प्राथमिकताय तया न्ह्या वनागु दु,’ शाक्यं धयादीगु दु, ‘येँ महानगरपालिकां बालागु ज्यायापि नाप सहकार्य याना वनेग नीति दु।

उगु नीति कथं जिमिसं कोरोनाया इलय् न थीथी अस्पतालयात ४५ भेण्टिलेटर हस्तान्तरण याये धुकागु दु। निगः प्रक्रिया पूरा मजुया हस्तान्तरण याये ल्यःदनिइ।’ मेयर शाक्यं डल्लुइ सामूदायिक स्वास्थ्य सेवा परिषदय् प्यंगु तलाया आधुनिक भवन निर्माणय् महानगरपालिकां सम्झौता याये धुकागु दु। ‘आः खरिद प्रक्रिया न्ह्या वने धुकुगु दु। याकन हे निर्माण प्रक्रिया न्ह्या वनिइ,’ धका धयादीगु खः।  महानगरय् च्वपिनिगु उठे जुगु कर उमिइगु हे सेवाय खर्च यायेगु नीति कथं शिक्षा, स्वास्थ्य लगायतया क्षेत्रय् प्राथमिकताय् तया ज्या न्ह्याका वयाच्वंनागु दु।

उगु ज्याझ्वलय् येँ महानगरपालिकाया प्रवक्ता नाप १५ वडाध्यक्ष ईश्वरमान डंगोलं आः सामूदायिक स्वास्थ्य सेवा परिषदपाखे सामाजिक सुरक्षा भत्ता कयाच्वपि ज्येष्ठ नागरिक, याक मिसा, अपाङ्ग जूपि व दलित निशुल्क स्वास्थ्य परीक्षण जुया च्वनागु दु। ‘वइगु दिं करदातापिन्त निशुल्क स्वास्थ्य परीक्षण यायेगु योजना दु,’ वयकलं धयादीगु दु, ‘गुलिफु उलि हे याकन वयकःपिनिगु प्रोत्साहित यायेगु कथं सेवा सुरु याये।’

Categorized in राष्ट्रिय