येँ महानगरया महाबौद्धय् १६ ल्हाःदुम्ह गनेद्यः नाप महाकाल भैरव व शनिदेवया देगः पुननिर्माण क्वचाःगु दु ।

येँ महानगरया मेयर विद्यासुन्दर शाक्यं पुनर्निर्माण क्वचाःगु उगु देगःया छगु ज्याझ्वः दथुइ उलेज्या यानादिगु खः। देगः उलेज्या धुंकाः संचारकःमितलिसे खँ ल्हासें महानगर मेयर शाक्यं सम्पदा पुननिर्माणलिसें सन्तुलित शहरी विकासया दक्वं पक्षय् महानगरं उत्तिकं बः बियाः ज्याझ्वः न्ह्याका च्वनागु दु धका धयादिगु खः।

‘धेबा मदयाः अमूर्त सम्पदालिसे सम्बन्धित छुं नं ज्याखँ मदीमा धकाः परम्परागत गुथिइ न १÷१ लाख तका ग्वाहालि उपलब्ध याकेगु निर्णय यानागु दु, थुकिं जीवन्त सांस्कृतिक शहर दयेकेत ग्वाहालि जुइगु अपेक्षा दु’ शाक्यया धापू खः । येँ महानगरपालिका २७ वडाया वडाध्यक्ष चिनियाँमान बज्राचार्यं थुगु देगःलिसे सम्बन्धित सांस्कृतिक व पुरातात्विक सम्बन्ध मालाच्वनागु जानकारी बियादिल ।

थ्वयां न्ह्यः सडकय् लानाच्वंगु देगः व्यवस्थित यानाः सडक सिथय् स्थापना यानागु वयकलं धयादिल । उगु इलय् थीथी वडाया वडाध्यक्ष, कार्यपालिका दुजःलिसें वडा २७ या वडा सदस्यत अले स्थानीय वासिन्दाया उपस्थिती दुगु खः ।

वडाया करीव १० लाख तकाया लागतय् जूगु पुनर्निर्माणय् स्थानीय मित्र युवा क्लव, मिसा पुचः व टोल सुधार समितिया नं ग्वाहालि दुगु धाःगु दु ।

Categorized in राष्ट्रिय