मन्त्रिपरिषदं निर्णय याःगु अध्यादेश राष्ट्रपतिपाखें प्रमाणिकरण मजुल
लहनान्यूज | गुंलाथ्व दशमी ११४१, भाद्र १ मंगलवाः
मन्त्रिपरिषदं याकन याकनं दल त्वाथलेगु अध्यादेश जारी यायेत सिफारिस यासां नं राष्ट्रपति विद्यादेवी भण्डारी न्ह्यने थ्यना अध्यादेश अथेस्तुं जूगु दु ।
थौं सुथय् मन्त्रिपरिषद मुँज्यां नेकपा एमालेया माधव नेपाल पुचः व जनता समाजवादी पार्टीया महन्थ ठाकुर पक्षयात दल त्वाथलेत अपुइकथं पार्टीया केन्द्रिय कमिटी वा संसदीय दलय् २०गू प्रतिशत दुजः दूगु पार्टी त्वाथलेगु प्रावधानलिसें अध्यादेश पारित याना राष्ट्रपतिसमक्ष प्रमाणिकरणया लागि छ्वःगु खः ।
प्रधानमन्त्री शेरबहादुर देउवा शीतल निवास थ्यंका राष्ट्रपति भण्डारीलिसे तकं नापालानादिगु खः । सिफारिस जुया वःगु अध्यादेश राष्ट्रपति भण्डारीसमक्ष पेश जूगु तर सहलह यायेमानिगु धासें थौं जारी जुइगु सम्भावना मदुगु धकाः राष्ट्रपतिया प्रमुख स्वकीय सचिव डा. भेषराज अधिकारीं जानकारी बियादिल ।
नेपाल कम्युनिष्ट पार्टी एमालें राष्ट्रपति भण्डारीयात अध्यादेश जारी मयायेत सार्वजनिक कथं अपील तकं याःगु दु । थ्वयांन्ह्यः प्रधानमन्त्री केपी शर्मा ओली मन्त्रिपरिषदं सिफारिस याःगु थ्वहे प्रकृतिया अध्यादेश धाःसा राष्ट्रपति भण्डारीं थथें जारी यानादिगु खः ।
Categorized in राष्ट्रिय
