अर्थ मन्त्रालयं खुम्ह सहसचिवया जिम्मेवारी हेरफेर व पदस्थापन यागु दु। मन्त्रालयं छु दिं न्ह्यः सरुवा जूपि प्यम्ह सहसचिवपिन्त पदस्थापन यागु दु।

स्वम्ह सहसचिवया जिम्मेवारी न हेरफेर यागु दु धका मन्त्रालयं धागु दु। थुकथं आन्तरिक राजस्व विभागया महानिर्देशक जुयाच्वम्ह झक्कप्रसाद आचार्ययात मन्त्रालय सःतूगु दु। वयागु थासय् शोभाकान्त पौडेल नियुक्त यागु दु।

भन्सार विभागय् च्वम्ह महानिर्देशक यमलाल भुसालयात न मन्त्रालय सःतूगु दु। वयागु थासय् नारायणप्रसाद सापकोटायात जिम्मेवारी बिगु दु। पौडेल थ्व स्वया न्ह्यः सञ्चार मन्त्रालय व सापकोटा अख्तियार दुरुपयोग अनुसन्धान आयोगय् खः। आचार्य व भुसालयात मन्त्रालय जगेडय् तःगु दु।

अथेहे अर्थया प्रशासन प्रमुखया जिम्मेवारीइ केदारनाथ शर्मायात हःगु खः। मन्त्रालयया बजेट महाशाखा प्रमुखया जिम्मेवारीइ च्वम्ह सुमन दाहालया थासय् लगानी बोर्डय् च्वम्ह भूपाल बरालयात यकूगु धका मन्त्रालयं जानकारी बिगु दु। दाहालयात आर्थिक नीति महाशाखाय् हःगु दु।

Categorized in राष्ट्रिय