मलेसियां शनिवाः छन्हुं हे २४म्हेसिया सीम्ह नेपाः थ्यंकेहल
गुंलाथ्व पञ्चमी ११४१, भाद्र ६ आइतबाः
मलेसियां शनिवाः छन्हुं हे २४म्हेसिया सीम्ह नेपाः थ्यंकेहःगु दु ।
रोजगारीया झ्वलय् मलेसियाय् वंपिं थीथी ईलय् सीपिं नेपामिपिन्त नेपाल वायुसेवा निगमया वाइडबडी विमानय् तयाः येँ थ्यंकेहःगु खः ।
वैदेशिक रोजगार बोर्डं मलेसियां गुम्ह सीम्ह अले १५म्हेसिया अस्थु यानाः जम्मा २४म्ह सीम्ह नेपाः थ्यंकेहःगु धागु दु । कोभिडया हुनिं नियमित उडान जुइमफयाः सीपिन्त छक्वलं हःगु बोर्डं धागु दु ।
९म्हेसिया सीम्ह विमानस्थलं तप्यंक्क सम्बन्धित छेँजःयात लःल्हाःगु दुसा अस्थुया नितिं छेँजःपिन्त विमानस्थलय् सःताः जिम्मा ब्यूगु धागु दु । झण्डै निगू दशक थुखय् देय्या आर्थिक मेरुदण्डया मू लिधंसाया रुपय् रेमिट्यान्सयात कयाःवःगु दु ।
रेमिट्यान्सयात आर्थिक जँ धाःसां विदेशय् ध्यबा कमे यायेत वंपिं सीपिनिगु ल्या न लिपांगु ईलय् अप्वःगु दु । औसत न्हिच्छिया ३म्ह सीम्ह विदेशं वइगु वैदेशिक रोजगार वोर्डं धागु दु ।
बोर्डया धलःकथं वंगु दँय् द्वछि २सः व ४२म्ह नेपामि विदेशय् सीगु दु । थ्व ल्या न्हापांगु दँय् ६सः व ७४म्ह जक खः ।
Categorized in राष्ट्रिय
