साहित्यकार शान्तराज शाक्ययात छगू समारोहया दथुइ सिरपाः दाता कवियत्री प्रधानया काय् मञ्जुर प्रधानं सिरपाःया दसिपौ व नगद झीद्वः तका लःल्हागु दु।

मदुम्ह कवियत्री मन्दिरा प्रधानया नामय् ४९ दँ न्ह्यः स्थापित थुगु सिरपाः नेपालभाषा साहित्य ख्यलय् योगदान ब्यूपिं साहित्यकारतय्त बिया वयाच्वंगु खः। बाखं कनेगु व न्यनेगु परम्परायात पुनर्जीवन ब्यूगु, थीथी बाखं च्वमिया पुलांगु कृतियात आधुनिक पुस्तायात म्हसीकेत, नेपाल व नेपाली भाषाया बाखंया माध्यमं उकिया नैतिक, सांस्कृतिक हसनायात प्रचार याय्त योगदान ब्यूगुलिं शाक्ययात उगु सिरपाः ब्यूगु खः।

लकडाउनया इलय् न थःगु फुर्सदया इलय् साहित्यकार शाक्यं फेसबुकपाखें बाखं न्यंकेगु यानावया च्वंगु खः न्हियान्हिथं नियमित रुपं वाचन याइगु विश्वप्रसिद्ध बाखं, नेपालभाषाया लोकबाखं, ऐतिहासिक बाखं वाचन व शैली यक्व हे न्यँमिपिनिगु नितिं त्वःफिके मज्यूगु ज्याझ्वः जूगु खः। ‘लकडाउन आपाःसिगु नितिं समस्या बीगु, दुःख बीगु ई जुल तर, जिगु लागिं धाःसा ह्वःताः जुल । फुर्सदया ईयात फेसबुक माध्यमयात छ्यलाः बाखं कनेगु न्ह्याकाबलय् शुरुइ न्यँमिपिन्सं गुकथं काइ धइथें ताःगु खः’ साहित्यकार शाक्यं धयादिल ‘लिपा वःगु प्रतिक्रियां जितः तसकं उत्साहित दय्कल, छन्हु जक बाखं कनेमफुत धाःसां मनूतय्सं जितः म्हं मफुतला धकाः न्यनाहइगु, थुकथं सिरपाः चूलाइ धकाः ला बिचाः तक नं मयाना ।’

अथेहे, वरिष्ठसिने पत्रकार विजयरत्न असंबरें कोरोना संक्रमणया इलय् मनूत तसकं चिन्तित, ग्याःचिकुया दथुइ छेँय् हे कुंकाः च्वनेमाःबलय् शाक्यं फेसबुकया माध्यमं साहित्यया श्रीवृद्धिया लागिं बियादीगु योगदानयात च्वछानादिगु खः।

संचाःकःमि सुनील महर्जनं साहित्यकार शान्तराज शाक्यया बाखं वाचन, भाव सम्प्रेषणया कला व नैतिक, सांस्कृतिक चेत युक्त बाखं कोरोनाकालय् छेँय् कुंकाच्वनेमाःपिं मनूतय्त याउँक सासः ल्हाय्गु ‘भेन्टिलेटर’ थें जूगु बिचाः तयादिल ।सिरपाः ज्याझ्वःया कजिः सुरेन्द्रभक्त श्रेष्ठं भाषा, साहित्यय् योगदान ब्यूपिन्त हःपाः बीत सिरपाःया महत्वया विषयस थःगु बिचाः तयादिल।

Categorized in राष्ट्रिय