नेकपा (एमाले) या केन्द्रीय कमिटी बैठक थौं च्वनेत्यंगु दु। एमालेपाखे छुटे जुया पूर्वप्रधानमन्त्री माधवकुमार नेपाल नेतृत्वय् नेकपा (एकीकृत समाजवादी) न मान्यता कायेवं थौं एमालेया बैठक च्वनेत्यंगु खः।

पार्टी अध्यक्ष केपी शर्मा ओलीं थौं न्हिनय् १२ बजे बैठक सःतूगु दु धका पार्टी कार्यालय सचिव शेरबहादुर तामाङं जानकारी बिगु दु। बैठक यलया च्यासलय् तुलसीलाल श्रेष्ठ स्मृति प्रतिष्ठानय् सःतूगु खः।

१० बुँदे सहमति कार्यान्वयनय् मेगु सहमति जुइवं माधव नेपाल पक्षया दोस्रो तहया नेतापि एमालेय् हे लिहावयेवं न्हापागु पटक केन्द्रीय समिति बैठक च्वनेत्यंगु खः।

कार्यालय सचिव तामाङया कथं पार्टी विभाजनया पक्षय् दुपिन्त केन्द्रीय सदस्यय् कारबाही प्रक्रिया न्ह्याकेगु, १० बुँदे कार्यान्वयन प्रस्ताव सम्बन्धी स्थायी कमिटीया निर्णय अनुमोदन यायेगु, पार्टी सदस्यता वितरण व विधान महाधिवेशन नाप स्थानीय अधिवेशन बारे बैठकय् छलफल जुइत्यंगु खः।

Categorized in राजनीति