थौं श्रीकृष्ण जन्माष्टमी, कृष्ण द्यःया पूजा–आराधना यानाः हनाच्वन
शोभा श्रेष्ठ | गुंलागा अष्टमी ११४१, भाद्र १४ सोमवाः
थौं कृष्ण जन्माष्टमी । भाद्र कृष्ण अष्टमीया दिनय् हनीगु थुगु नखः थौं देय्न्यंक कृष्ण द्यःया पूजा–आराधना यानाः श्रद्धा–भक्ति लिसें हनाच्वंगु दु ।
ज्ञानयोग, कर्मयोग व भक्तियोगया प्रणेता कृष्ण द्यः द्वापर युगय् भाद्र कृष्ण अष्टमीया बाचाय् बूगु जूगुलिं थुगु दिंयात ‘श्रीकृष्ण जन्माष्टमी’ व चायात ‘मोहरात्री’ धाइ ।
थ्व झ्वलय् देय्न्यंकया कृष्ण मन्दिरय् कृष्ण द्यःया पूजा–आराधना, प्रवचन, भजनकीर्तन यायेगुया लिसें श्रद्धालु भक्तजनत अपसं च्वनाः चच्छि जाग्राम च्वनेगु याइ । अन्याय, अत्याचार व राक्षसी प्रवृत्तिं मुक्कं मानव समाजया रक्षा यायेत विष्णुया च्यागूगु अवतार अले वसुदेव व देवकीया च्यागूगु गर्भया रुपं जन्म जूम्ह कृष्णं आजीवन सत्यया पक्षय् च्वनाः सत्कर्मया लागिं मानव समुदाययात प्रेरित याःगु शास्त्रीय वर्णन दु ।
कुरुक्षेत्रय् कौरवलिसेया लडाइँलय् पाण्डव मध्येया अर्जुनयात उपदेश बीगु झ्वलय् स्वयं कृष्णया म्हुतुं पिज्वःगु ‘श्रीमद्भागवतगीता’ वैष्णवतय् पवित्र ग्रन्थ खः । गीता हलिंया दकले अप्वः भाषां अनुवाद जूगु ग्रन्थ नं खः ।
थ्व झ्वलय् यलया मंगःस्थित नांजाःगु कृष्ण मन्दिरलिसें देय्न्यंकया कृष्ण मन्दिरय् विशेष मेला जुइगु याः । यद्यपि कोरोनाया हुनिं न्हापा न्हापाया दँय् स्वयां थुगुसी भक्तजनतय् भिडभाड म्ह्वः जुइगु जूगु दु । थुगु नखःया झ्वलय् न्हापाया दँय् क्वपाःगु सार्वजनिक बिदा थुगुसीनिसें हाकनं बीगु याःगु दु ।
थ्व हे दथुइ, राष्ट्रपति विद्या भण्डारीं श्रीकृष्ण जन्माष्टमी अले गौरा पर्वं नेपाली मौलिक तजिलजिया संरक्षणय् थप योगदान यासें सभ्य, सुसंस्कृत व प्रगतिशील समाज दयेकेत न्ह्यज्यायेगु नितिं सकसित हःपाः बीमा धकाः कामना यानादीगु दु ।
लोक परम्परा अले सांस्कृतिक पर्वं विविधतां जाःगु नेपाली समाजय् सामाजिक व सांस्कृतिक ऐक्यबद्धता अले सहिष्णुता थकयाः राष्ट्रिय एकता सुदृढ यायेत ग्वहालि बियावःगु वय्कःया भिंतुना हसनाय् धयातःगु दु ।
अथे हे, प्रधानमन्त्री शेरबहादुर देउवां भिंतुना हसना ब्युसें श्रीकृष्ण जन्माष्टमी अले गौरा पर्वं राष्ट्रिय एकताया भावना अझ बल्लाकेमा धकाः कामना यानादीगु दु ।
Categorized in राष्ट्रिय
