सुनुवाइ सभामुख अग्नि सापकोटाविरुद्धया मुद्दा संवैधानिक इजलासय् सुनुवाइ जुयाच्वंगु दु। प्रधानन्यायाधीश चोलेन्द्रशमशेर जबरा नेतृत्वया संवैधानिक इजलासय् दीपककुमार कार्की, मीरा खड्का, हरिकृष्ण कार्की व ईश्वरप्रसाद खतिवडा न्यायाधीशपि खः।

थ्व स्वया न्ह्यः ३० फागुन २०७६ य् न थुगु मुद्दा पेशीइ चढे यागु खः, तर स्वये मलाः धका सुनुवाइ सरे यागु खः। सशस्त्र द्वन्द्वकालय् काभ्रेया अर्जुन लामाया हत्याय् संलग्न जुगु द्धपः सापकोटायात बिगु खः।

१६ वैशाख २०६२ य् श्रीकृष्ण मावि, दाप्चाय् अभिभावक भेला जुगु थासं लामा अपहरणयाना यकूगु खः। गाः खना लामायात म्वा म्वाकं ल्हाकूगु धका वया जहान पूर्णिमायां २०६४ सालय् जाहेरी बिउगु खः। प्रहरीं जाहेरी मकागुलि पूर्णिमायां सर्वोच्चय् उजुरी तःगु खः। २२ फागुन २०६४ य् सर्वोच्चं आदेश बिउगु व जाहेरी दर्ता यागु खः।

तर बाबुराम भट्टराई नेतृत्वया सरकारं सापकोटा विरुद्धया जाहरी तामेलीइ तयेगु निर्णय याउगु खः। वया लिपा पूर्णिमां हाकनं सर्वोच्च वना व सर्वोच्चं निर्णय कार्यान्वयन मयायेत आन्तरिम आदेश बिउगु खः। थुगु मुद्दा सर्वोच्चया संवैधानिक इजलासय् विचाराधीन खः ।

मुद्दा विचाराधीन जुगु इलय् सापकोटा सञ्चारमन्त्री जुगु यलय् कनकमणि दीक्षित लगायतं सर्वोच्च अदालतय् अवहेलना मुद्दा तःगु खः।

Categorized in राष्ट्रिय