बौद्ध संस्कृति व संस्कारया जर्गेना यायेगु कथं यल महानगरपालिका– १६ वडा न बज्राचार्य पुजाविधि अध्ययन समितियात ५ लाख लल्हागु खः।

बज्राचार्य गुरुजुपिन्स विहीबाः धार्मिक पुजा याना वडा अध्यक्ष निर्मलरत्न शाक्य, वडापि पञ्चबज्र बज्राचार्य, सुप्रभा शाक्यं मंकाः कथं समितिया अध्यक्ष दीपक बज्राचार्ययात उगु चेक लल्हागु खः।

चेक हस्तान्तरणया झ्वलय् बज्राचार्य गुरुजुपिन्स मंगलास्तोत्र पाठ याउगु खः। उगु ज्याझ्वलय् वडाअध्यक्ष शाक्यं नेवाः बौद्ध समाजया प्रत्येक संस्कृति, परम्परा, संस्कारय् पुजा नाप स्वाउगु खँ कनादीसेँ पुजा यायेगु धार्मिक विधि, पद्धतिया संरक्षण व आधुनिक पुस्ताया गुरुजुपिन्स उत्पादन यायेत नीस्वनातःगु अक्षय कोषया लागि उगु रकम लल्हानागु खः धका धयादीगु खः।

भौतिक पूर्वाधारया नाप संस्कृति, संस्कार न मानवीय विकासया नाप स्वापू दुगुलि थुकिया संरक्षण यायेगु स्थानीय तहया दायित्व खः धका वडाअध्यक्ष शाक्य धयादीगु खः। उगु ज्याझ्वलय् समितिया अध्यक्ष दीपक बज्राचार्य ने धार्मिक पुजाविधिं सैद्धान्तिक ज्ञान, विधि व थुकिया महत्व पुस्तान्तरण मजुया छगु इलय् लोप जुइत्यंगु धका धयादीगु खः।

समिति स्थापना जुइगु स्वया निदँ न्ह्यः २०५२ सालय् बौद्ध संस्कृति विद्यार्थी संघय् च्याम्ह गुरुजुपि पाखे पुजा यायेगु विधिबारे औपचारिक रुपं प्रशिक्षण बिउगु ज्या शुरु याउगु खःसा आः सच्छिम्ह स्वया अप्वो गुरुजुपि उत्पादन जुइ धुकुगु दु धका समितिं धागु दु।

Categorized in राष्ट्रिय