वाःया लिपागु दिं शेयर बजाः घटे जूगु दु। म्हिगः बुधवाः सामान्य थहावंगु नेप्से थौं बिहीवाः ५० दशमलव १३ अङ्कं घटे जुया २ हजार ९ सय २६ दशमलव ८९ विन्दुइ कुहावंगु दु।

थौं दक्को समूहया शेयर घटे जुगु दु। बैंकिङ समूहया शेयर १६ अङ्क, विकास बैंकया १ सय ८६ अङ्क, जलविद्युतं १ सय १६, फाइनान्सय् १ सय १४ व माइक्रोफाइनान्स समूहया शेयर साढे २३ अङ्कं घटे जुगु दु।

अथेहे जीवन बीमा समूहया शेयर ३ सय ४२, निर्जीवन बीमा समूहया २ सय ३३, उत्पादनया १ सय २७, मेमेगु समूहया ३७ व लगानी समूहया शेयर साढे ३ अङ्कं घटे जुगु दु। थौं नारायणी विकास बैंक, कर्णाली विकास बैंक, अरुण काबेली पावर कम्पनीया शेयर ६ प्रतिशत स्वया यक्को घटे जुगु दु।

समग्र बजार घटे जूसा सानिमा लाइफ इन्सोेरेन्स व मनकामना स्मार्ट लघुवित्तया शेयर १० प्रतिशतं थहावंगु दु। थौं २ सय ३० कम्पनीया १ करोड ८१ लाख कित्ता शेयर ९ अर्ब ५० करोड ५९ लाख रुपैयाँ कारोबार जुगु खः। दकलय् अप्वो अरुण भ्याली हाइड्रोया ५७ करोड ४० लाख रुपैयाँया शेयर किनबेच जुगु दु।

Categorized in राष्ट्रिय