येँ महानगरपालिका प्रमुख विद्यासुन्दर शाक्यं मरुसतः (काष्ठमण्डप)पुनर्निर्माणया ज्या लिपांगु चरणय् थ्यंगु धयादीगु दु।

काष्ठमण्डप परिसरय् हे ‘न्यकू बाजा र गुंला’ सफूया विमोचन यासें मरुसतःया पुनर्निर्माणया ज्या ९५ प्रतिशत ज्या क्वचाःगु धयादिल।

आः मरुसतःया पलिं चीगु ज्या जुयाच्वंगु जानकारी ब्युसें शाक्यं बागमति प्रदेश सांसद राजेश शाक्य व वय्कःया टीमयात सुभाय् नं देछानादिल।

मरुसतः पुनर्निर्माणया ज्या येँ महानगरपालिकाया आर्थिक ग्वाहालिं प्रदेश सांसद राजेश शाक्यया नेतृत्वय् जुयाच्वंगु दु। पुर्खां न्यंकावंगु इतिहास लिपिबद्ध मजूबलय् विदेशी सफूया बः काय्माःगु धासें शाक्यं दुःख प्वंकादिल।

थनया फोटो काय्मज्यू धाःगु हे संस्कृति, सम्पदाको फोटोलिसें कनेमज्यू धाःगु खँत दक्वं विदेशी सफुतिइ ब्वनेमालाच्वंगु धासें वय्कलं असन्तुष्टि प्वंकादिल।

वय्कलं महानगरपालिका दुनेया दक्वं विद्यालयय् १ निसें १२ कक्षातक्कय् स्थानीय पाठ्यक्रम लागू याय्माःगु माग वयाच्वंगु धासें शाक्यं थुखेपाखे महानगर सचेत दुगु धयादिल।

ज्याझ्वलय् बागमति प्रदेश सांसद राजेश शाक्यं मरुसतःया पलिं चीगु ज्या जुयाच्वंगु धासें आः याकनं हे ज्या क्वचाइगु दावी यानादिल।

Categorized in राष्ट्रिय