२०८१ आषाढ ३०, आइतबार

सुरक्षायात ध्यानय् तयाः येँयाः हने, येँयाःया भिन्तुना

काजीरत्न | ञंलाथ्व एकादशी ११४१, असोज १ शुक्रवाः

येँयाः नं तय्जु याःवल । थगुने ला छुं हे याय्मखंक अथे हें याः न्यानावन । थुगुसी जात्रा जुइगु संकेत गाक्कं खनेदय्धुंकल । इन्द्रजात्रा व्यवस्थापन समितिं नं जात्रा याय्गु निर्णय याय्धुंकल सा यःसिँ नं थ्यनेधुंकल । रथ दय्केज्या नं धमाधम जुयाच्वंगु दु । व ल्याखं थुगुसी हःसे हैंसे यायां भैलःद्यः, गनेद्यः व कुमारीया रथ सालीगु पक्का हे धइथें खनेदु । थनथाय् जात्रा जुइगु लसता ला छखे द हे दु, मेखे ग्याःचिकु नं मदुगु मखु । 
 
जात्रा जुइ, रथ सालेत सःबसः, जात्रा स्वय्त सःबसः मु हे मुनी । धाधां द्वलंद्वःया हे ल्याखय् मनूतय् चहलपहल जु हे जुइ । नकतिनि कोरोना संक्रमण भचा नियन्त्रणय् वःगु थें खनेदयाच्वंगु अवस्थाय् हाकनं थुकथं यक्व मनूत मुनीबलय् संक्रमण अप्वयावनीगु जकं खःला धकाः मनय् ग्याःचिकु नं अप्वःसिगु नुगलय् ब्वलनाच्वंगु नं खनेदु । खँ गलत नं मखु । छगू ला झीगु जात्रापर्व मजुइवं हे संक्रमण नियन्त्रणय् वइगु नं मखु । थन मास्क हे मतःसे, लापरवाही ढङ्गं मनूत जुया हे च्वंगु दु, हुलमुल ला उलि हे जुयाच्वंगु द हे दु । व ल्याखं जात्रा मयाय्गु जक हे नं विकल्प मखुत । तर सतर्कता धाःसा नालेमाःगु हे खनेदु ।
 
जात्रा धाय्वं हुलमुल याय् हे माः धयागु मदु । छखे झीगु जात्राया निरन्तरताया सवाल दुसा मेखे समाजयात सुरक्षित यानातय्गु दायित्व नं झीगु हे ब्वहलय् दु । कोभिड १९ महामारी नेपालय् जक वःगु मखु, मुक्कं हलिंयात हे थुकिं आक्रान्त दय्कूगु दु । थज्याःगु अवस्थाय् नेवाः जात्रापर्व न्याय्के मबीत जक कोरोनाया हल्ला याःगु धइगु कथंया खँ नं मल्हाय् । यदि अथे हे खःसां थन कोरोना संक्रमणं कयाः हे उलिमछि मनूत मदया वनेधुंकल । झीगु भाषा ख्यलय् हे वःम्ह मछि भाषासेवीतय् मृत्यु थ्व हे कोरोना संक्रमणं यानाः जुइधुंकल ।
 
aयदि नेवाः जात्रापर्व हंकेमबीत हे जक कोरोनाया हल्ला याःगु धाय्गु सा उलिमछि मनूत छु जुयाः मत्यवं मदयावन ? व नं हल्ला जक धाःपिं मनं मदुगु मखु तर, अथे धाय् न्ह्यः थः मनू मदय्काः च्वनेमाःपिं परिवारयात गज्याःगु पीडा जुइ व नं बिचाः याय् । कोरोना ल्वचं कयाः सास्ती नःपिन्सं थज्याःगु खँ ताइबलय् गथे जुइ व नं बिचाः याय् । भावनात्मक मखु, व्यवहारिक जुइ हे माः ।
 
थ्व दक्वं खँया अर्थ जात्रा मन्याके धयागु पक्कां हे मखु । मात्र झीगु समाज सुरक्षित यानातय्त झी थः हे सतर्क जुइ धइगुसम्म जक खः । झी थः हे सतर्क जुल धाःसा झीगु नखःचखः, जात्रापर्वयात न्ह्याकाच्वनेगु वातावरण नं दयाच्वनी । म्वाय्कं जात्राय् हुलमुल याः मजुइ, मास्क, फेसशिल्ड, सेनिटाइजर थुज्वःगु सुरक्षाया उपाययात लिना हे च्वने । साब्वनं इलय्ब्यलय् ल्हाः सिला हे च्वने, भौतिक दुरीयात गबलें ल्वःममंके । थज्याःगु सकतां सुरक्षाया उपाययात लिनाः झीगु संस्कृतियात निरन्तरता बी । येँयाःया भिन्तुना ।