येँ महानगरपालिकाया मेयर विद्यासुन्दर शाक्य व उप मेयर हरिप्रभा खड्गी श्रेष्ठ सम्मानित जुगु दु।

येँँ महानगरदुने खड्गी समुदायया बाजं खलः व गुठीपिन्स मेयर व उपमेयरयात हंगु खः। नेपाल खड्गी सेवा समितिया ग्वसालय् गुठीयारपिन्स मेयर व उपमेयरयात हंगु खः। येँ महानगरया मूर्त अमूर्त सांस्कृतिक सम्पदा, नेपाल भाषाया संरक्षण व प्रवर्धन, बाजं गुरुपिन्त प्रोत्साहन व आर्थिक अभावं परम्परागत क्रियाकलाप बन्द जुइगु अवस्था दुगु गुठीयात संस्कृतिया निरन्तरताया लागि आर्थिक अनुदान थे जाःगु महत्वपूर्ण ज्याया कदर यासे हंगु खः।

सम्मान ज्याझ्वल् न्ववानादीसे मेयर विद्यासुन्दर शाक्यं, येँ महानगर दुने मौलिकता झीसं हे ल्यकातयेमाः धका धयादीगु खः। ‘सम्पदाया संरक्षण व प्रवर्धन यायेत झी हे न्ह्यचीलेमाः। वयकलं धयादीगु दु, ‘सम्पदा पुननिर्माण महानगरं याइ। सञ्चालनया जिम्मा समुदायपिन्स कायेमाः। जिमिसं सम्पदायात पर्यटन नाप स्वाना स्थानीयपिनिगु जीवन स्तर गकायेगु ज्याझ्वः हयागु दु।’

अथेहे व उपमेयर हरिप्रभा खड्गी श्रेष्ठं, संस्कृति बचे यात धासा जक झीगु मौलिकता बचे जुइ। ‘थुकिया लागि महानगरं योजना व स्थानीयपिनिगु न सहभागिता माः। थज्यागु सहकार्य जुल धासा जक सम्पदा बचे जुइधका धयादीगु खः। येँ महानगरपालिकां खड्गी गुठीया प्यगु भौतिक संरचना निर्माणया लागि बजेट विनियोजन याये धुकुगु दु।

श्री कंग अजिमा तःध गुठी, मेहरसिंह गुठी, शान्त गुठी व नरसिंह गुठी न निर्माण जुइ त्ंयगु खः। उगु संरचना पुननिर्माणया लागत करीव ५ करोड रुपैयाँ जुइगु अनुमान दु।

Categorized in राष्ट्रिय