२०७८ कार्तिक १०, बुधबार

मेयरया स्वार्थया नितिं ज्यापू समाजय् बलजफ्ती समाजया एकता व आस्थाय् आघात

लहनान्युज | ञंलागा औंसी ११४१, असोज २० बुधवाः

मेयर चिरिबाबु महर्जनया राजनीतिक महत्वाकांक्षाया परिपूर्तिया निंतिं ज्यापु समाजया न्हूगु ज्यासना पुचः ल्यज्याय् पुलांपिं नायःपिनि गुटं बलजफ्ती याःगु खनेदु । 
 
उकिया निंतिं थम्हं धयाथें दुम्ह (एस म्यान) व चुनावय् आर्थिक ग्वाहालि यायेत माःगु इलय् युवा परिचालन तकं यानाः न्ह्यागु कथं नं ग्वाहालि याइपिं मनूत माः । उकिया निंतिं मेयर महर्जनलिसें पुलांपिं नायःया गुटं वरिष्ठ न्वकु सन्तमान महर्जनयात नायः जुइगुलिं पंगु खँ वःगु दु । नायः पदय् सन्तमानया थासय् चुनावया निंतिं गय् फइम्ह सलकथं  तीर्थलाल महर्जनयात नायलय् हय्त पुलांपिं नायःया गुटं बन्दसत्रय् हस्तक्षेप याःगु खः ।
 
कुलाल डंगोलया कजिसुइ पुलांपिं नायःपिनि संरक्षक परिषद दु । उगु परिषद्य् पूर्वअध्यक्षया हैसियत मेयर चिरिबाबु, अधिवक्ता मङ्गल महर्जनलिसें न्हय्म्ह दुजः दु । हरेक अधिवेशनय् न्हूगु कार्यसमिति ल्यइबलय् उपिं हे पुलांपिं नायःपिं हावी जुया वयाच्वंगु दु । बन्दसत्र तारन्ताः स्थगित यानाः थप याःगु अवधि पुलांपिं नायःपिनि पुचलं दुनेदुनें वरिष्ठ न्वकु सन्तमान महर्जनयात नायः जुइगुलिं पनेत अनेक तिकडम व षडयन्त्र यायेत छ्यःगु खः । 
 
शुक्रवाः जूगु बन्दसत्रय् संरक्षक परिषद्पाखें न्ववाय्गु झ्वलय् संयोजक कुलाल डंगोलं पुलांपिं नायःपिं न्हय्म्हेसिया सहमति धकाः नायलय् तीर्थलाल महर्जनया नां न्ह्यथंगु खः । उकी अप्वः थें प्रतिनिधिपिसं विरोध याःगु खः । अनंलिपा सहमतिया कुतः याय्गु धासें सहलहया नाटक यात । पुलांम्ह नायःया गुटं यक्व तिकडम याःबलय् नं नेतृत्व ल्ययेगु समाजया परम्पराकथं वरिष्ठ उपाध्यक्ष सन्तमान महर्जनयात अध्यक्ष दय्केगु अडानय् हौगःत्वाःया नायः व प्रतिनिधिपिं छगू इन्च नं टसमस मजू । अनंलिपा पुलांपिं नायःपिनि दबाबय् निर्वाचन मण्डलया कजि अधिवक्ता चन्द्रबहादुर महर्जनं न्हूगु कार्यसमिति नामावली घोषणा याःगु खः । उकीइ बन्दसत्रय् ब्वति काःगु अप्वः थें त्वाःया नायः व प्रतिनिधिं विरोध प्वंकूगु खः । निर्वाचन मण्डलया कजिं न्ह्यथंगु न्हूगु ज्यासना पुचःया नां
अनुमोदन मजुइवं हाकनं सहमतिं हे नां प्रस्तावित याय्गु धकाः छुं ईया निंतिं सभा स्थगित याःगु खः । 
 
अनंलिपा सहमतिया निंतिं छुं कुतः मजू । थ्व ला ई ताःहाकेगु चाल जक खः । चा छाय् धुंकाः बाचा इलय् निर्वाचनया प्रक्रिया थौं न्ह्याइमखु धइगु अनुमान यानाः अधिकांश ब्वति काःपिं थःगु छेँय् लिहाँ वने धुंकूगु खः । अन छुं सुनियोजित तरिकां मुंकूगु छुं ल्याय्म्हत जक हलय् दुगु खः । मुक्कं १०, १२ म्ह जक ल्याय्म्हत मुनाच्वंगु इलय् वयां न्ह्यः  अनुमोदन मजूगु ज्यासना पुचःयात शपथ ग्रहण याकल । शपथ ग्रहण ज्याझ्वलय् नायः जुइगुलिं पनाब्यूपिं वरिष्ठ न्वकु महर्जन, प्रथम उपाध्यक्ष मोहन व्यञ्जनकार, तृतीय उपाध्यक्ष किरण डंगोल, ज्यासना पुचःया दुजः शर्मिला महर्जनं बहिष्कार याःगु खः । थुकिया हुनिं ज्यासना पुचः पूवने फुगु मदुनि । थुकिया माइन्यूटतकं खडा मजुल । 
 
समाजया परम्परा त्वाःदल
 
समाजय् कार्यसमिति दुनं हे वरियताक्रम कथं वरिष्ठ न्वकूयात हे नायः ल्यय्गु विधियात स्थापनाकालनिसें हे संस्थागत यानावःगु खः । समाजया १०क्वःगु महाधिवेशन व २८क्वःगु साधारण सभा धुंकाः थ्व हे अभ्यास कथं अध्यक्ष जुइगु पाः वरिष्ठ उपाध्यक्ष सन्तमान हे खः । तर थुगु पालय् समाजया थ्व परम्परा त्वाःदःगु दु । नेतृत्व ल्यज्याया विषयस सहमति जुइमफयाः हे थ्वयां  न्ह्यः सःतूगु बन्द सत्र स्थगित यायेमाःगु खः । भदौ २६, असोज १ धुंकाः स्वक्वःगु खुसी असोज १५ गते शुक्रबाः सःतूगु बन्द सत्र चान्हय् लिबाक्क तक्क हे न्ह्याःगु खः । बन्दसत्रय् दंगु न्ह्यसःया छुं हे लिसः मब्युसें साविक अध्यक्ष चन्द्र महर्जनं वर्तमान कार्यसमिति विघटन यानागु घोषणा यानाः एकतर्फी रुपं न्हूगु कार्यसमितिया नां धलः वाचन यायेत इनाप यानादीगु खः । थुगु बन्द सत्रय् नःत्वाःपाखें ल्ह्वंगु न्ह्यसः व असन्तुष्टी छुं हे सम्बोधन मजुल । न समाज न्ह्याकेगु खँय् सार्थक बहस जुल । 
 
वहेकथं नायः चन्द्र महर्जनं आः वइम्ह नायः सन्तमान महर्जन धकाः छुं ई न्ह्यः अनौपचारिक सहमति याःगु खः । तर लिपांगु इलय् पूर्वअध्यक्षपिनिगु दवाव, विभिन्न शक्ति केन्द्रया दवावं सहमतिपाखें वय्कः लिचिला दिल ।
 
न्हूगु कार्यसमितिया नां घोषणाया झ्वलय् थ्व स्वयां न्ह्यः हे अस्वीकृत जुइधुंकूगु नां वाचन यात धकाः विरोध यासें थुकी जिमिगु मञ्जुरी मदु धकाः सः थ्वयाच्वंगु नं खःसां निर्वाचन समितिया कजि अधिवक्ता महर्जनं कार्यसमितिया नां खुरुखुरु ब्वनाः न्यंकादीगु खः । उबले विरोध यासें हुटिङ्ग तकं जूगु खः । थज्याःगु हे तनाव व होहल्लाया दथुइ बन्दसत्रया छुं सहभागीतय्सं प्रायोजित तरिकां छुं युवा व पर्यवेक्षकपिसं लापा नं थाःबलय् व हे लापा थानाः बहुमतं न्हूगु कार्य समिति अनुमोदन याःगु अर्थ बियाब्यूगु खः । व धुंकाः सभा बहिष्कार धासें थीथी त्वाःया प्रतिनिधित सभाहलं पिहांवंगु खः । सन्तमान महर्जनलिसें नःत्वाःया अध्यक्ष कदमलाल महर्जन व प्रतिनिधिपिं सभा वहिष्कार धासें पिहांवन सा नोट अफ डिसेन्ट धासें हौगः त्वाःया प्रतिनिधि, च्यासः त्वा, तःननी त्वाःलिसें
 
थीथी त्वाःया नायः व प्रतिनिधि सभाहलं पिहांवंगु खः । 
 
समाजय् पूर्वअध्यक्षपिनिगु नांगो हस्तक्षेपं समाजया एकताया भावनाय् चिरा परे जुइगु ज्या याःगु धकाः विभिन्न त्वाःया सचेत प्रतिनिधिपिसं विरोध यानाच्वंगु दु । छुं छुं व्यक्तिया राजनीतिक व आर्थिक स्वार्थया निंतिं विधि व परम्परायात प्रहार यानाः समाजयात राजनीतिक रुपं जबर्जस्ती विभाजन याय्गु लँय् यंकूगुलिं अप्वः मनूतय्सं चिन्ता प्वंकाहःगु दु ।
 
निर्वाचन मण्डलपाखें निम्हेसिया राजीनामा
 
पूर्वअध्यक्षपिंलिसें विघटित कार्यसमितिया अध्यक्ष चन्द्र महर्जनं जबरजस्ती न्हूगु कार्यसमितियात निर्वाचन मण्डलपाखें अनुमोदन याकेत स्वय्धुंकाः निम्ह निर्वाचन अधिकृतं राजिनामा हे ब्यूगु दु । निर्वाचन अधिकृतद्वय अधिवक्ता नानीछोरी महर्जन, अधिवक्ता सागरमान व्यञ्जनकार दबाबया दथुइ ज्या याय्गु लकस मदुगु धासें सभाहलं पिहांवंगु खँ अधिवक्ता नानीछोरी महर्जनं प्रस्तावित उम्मेदवार उपस्थित मजूगु, गणपूरक संख्या मगाःगु हुनिं तत्काल मतदाता नामावली, उम्मेदवार मनोनयन लगायत निर्वाचन कार्यक्रम याये फइमखु धकाः लिखितरुपं राजीनामा ब्यूगु खः ।
 
कार्यसमितिइ कांग्रेस कार्यकर्ता न्हूगु कार्यसमितिया नायः तीर्थलाल महर्जनलिसें अप्वः धइ थें न्हूगु ख्वाःपाः दुजःपिं नेपाली कांग्रेसया वडास्तरीय कार्यकर्ता दु । कार्यसमिति सदस्य प्रमिला महर्जन २० वडाया दुजः खःसा मञ्जु महर्र्जन नं कांग्रेस समर्थित खः । अथेहे दुजलय् रमिता महर्जन, बुद्ध महर्जन, दिनेश महर्जन,मदन महर्जन व रत्नमान महर्जन दुथ्यागु दु । समाजय् खास हे क्रियाशील मजूपिं मनूत तकं न्हूगु कार्यसमितिइ लाःगु दु । छुं मनूतय् स्वार्थया निंतिं सुनियोजित ढङ्गं कांग्रेस कार्यकर्तात समाजय् तय् हःगु धकाः तकं आः टिप्पणी जुयाच्वंगु दु ।