हिन्दु नेपामिपिनिगु तःधंगु नखः मोहनि, नःसस्वां पिनाः न्यायेकाच्वन
कौलाथ्व ११४१, असोज २१ बिहीवाः
हिन्दु नेपामिपिनिगु तःधंगु नखः, मोहनि थौंनिसें सुरु जूगु दु । मोहनि नखःया न्हापांगु दिं कथं थौं थीथी शक्तिपीठय् दर्शनार्थीपिनिगु भीड जूगु दु ।
आश्विन शुक्ल प्रतिपदानिसें पूर्णिमातक मोहनि नखः हनेगु चलन दु । थौं थःथःगु छेँय् नःसस्वां पिनाः मोहनि नखःयात लसकुस यानाच्वंगु दु ।
पञ्चाङ्ग निर्णायक समितिं सुथय् ११ताः ईजुयाः ४६गू मिनेटय् नःलस्वां पीगु भिंगु साइत सार्वजनिक याःगु दु । छ्व, तछ्व, कःनि तयाः नलःस्वां पीगु चलन दु ।
येँया हनुमानध्वाखा लाय्कूलीच्वंगु मोहनि छेँय् महालक्ष्मी, महासरस्वती व नवदुर्गाया पूूजा अर्चना यानाः स्वां सालेगु परम्परा दु । देय्या फुक्क राजगुठी अन्तर्गतया शक्तिपीठय् नःलस्वां पीगु अले सिन्हः तिकाबीगु जुयाः सर्वसाधारण मनूत अन थ्यंकाच्वंगु दु ।
शक्तिपीठय् स्थानीयबासीतय्सं यचुपिचु यानाः नःलस्वां साली । असत्ययात सत्यं त्याकूगु अले दानवी शक्तिइ दैवी शक्तिं त्याकूगु कथं थ्व नखःयात कायेगु याः ।
Categorized in राष्ट्रिय
