बागमती प्रदेशया सूचना संकलन व भण्डारण यायेगु उदेश्यं एग्रिगेटरया रुपं सूचना बैंक सञ्चालनय् हःगु दु।

सूचना बैंकया शुक्रबाः आन्तरिक मामिला तथा कानूनमन्त्री डा. अजयक्रान्ति शाक्यं हेटौँडाय् छगु ज्याझ्वः दथुइ उलेज्या यानादीगु दु। उलेज्यालिपा सम्बोधन यानादीसे मन्त्री शाक्यं बागमती प्रदेशया सूचना बैंकय् आः प्रदेशया न्ह्यगू मन्त्रालय, प्रदेश प्रमुखया कार्यालय, प्रदेशसभा नाप १४ गु कार्यालयय् सूचना छगु हे पोर्टलपाखे उपलब्ध जुइगु जानकारी बिउगु दु।

प्रदेश सञ्चार माध्यम व्यवस्थापन ऐन व नियमावली दुगु व्यवस्था कथं सञ्चार रजिष्ट्रार कार्यालयपाखे एग्रिगेटर सूचना बैंक सञ्चालनय् हःगु खः। मन्त्री शाक्यं नेपालय् न्हापागु पटक बागमती प्रदेशय् सूचना बैठक सञ्चालनय् वंगु गर्वया विषय जुगु धका धयादीगु दु।

‘१४ गु कार्यालयया सूचना आः सूचना बैंकय वइ,’ मन्त्री शाक्यं धाउगु दु, ‘बागमती प्रदेशया ११९ गु स्थानीय तहया सूचना वइगु कथं थुकिया विकास यायेगु जुइ।’ मन्त्री शाक्यं मन्त्रालयं बागमती प्रदेशया दक्को ऐन कानून एपया तयेगु याकन हे गृहकार्य जुयाच्वंगु जानकारी बिउगु दु।

गभर्नेस अटोमेसन सोलुसनं तयार याउगु सूचना बैंकय् आः मुख्यमन्त्री तथा मन्त्रिपरिषदया कार्यालय, प्रदेश प्रमुखया कार्यालय, प्रदेश सभा, आन्तरिक मामिला तथा कानून मन्त्रालय, आर्थिक मामिला तथा योजना मन्त्रालय, भौतिक पूर्वाधार विकास मन्त्रालय, सामाजिक विकास मन्त्रालय, उद्योग, पर्यटन, वन तथा वातावरण मन्त्रालय, भूमि व्यवस्था, कृषि तथा सहकारी मन्त्रालय, प्रदेश नीति तथा योजना आयोग, सञ्चार रजिष्ट्रारया कार्यालय, प्रदेश लेखा नियन्त्रक कार्यालय, यातायात पूर्वाधार निर्देशनालय, पशुपन्छी तथा मत्स्य विकास निर्देशनालयया वेवसाइटय् तःगु दु धका सूचना बैंकय् संग्रहित तःगु दु।

Categorized in राष्ट्रिय