येँ महानगरपालिकाया सुविधासम्पन्न थःगु हे केन्द्रीय भवन दयकिइगु जुगु दु।

भूमिगत तल्लानाप च्यागु तल्लाया उगु भवन थौं येँ महानगरपालिकाया मेयर विद्यासुन्दर शाक्यं शिलान्यास यानादीगु दु। आःयाउगु वातावरण विभाग दुगु जमिनय् करीब ६ रोपनी क्षेत्रफल दुगु उगु भवन दयकेत्यंगु खः।

भवनया शिलान्यास यासे मेयर शाक्यं थःगु कार्यकालय् दक्को वडाया वडा कार्यालय भवनया पुनर्निमाण व न्हुगु निर्माणया सम्पन्न यायेगु प्रतिवद्धता कथं उगु भवनया शिलान्यास यानागु जानकारी बियादीगु खः। ‘जिपि निर्वाचित जुया वये धुका न्हापागु बैठकय् येँ महानगरपालिकाया केन्द्रीय कार्यालय व दक्को वडाया कार्यालय भवनया पुनर्निमाण व न्हुगु निर्माणयात प्राथमिकताय् तया ज्या यायेगु धका घोषणा यानागु खः’ शाक्यं धयादीगु दु, ‘सेवाग्राहीपिन्स सेवा कायेगु थाय् सेवाग्रही मैत्री जुइमाः धका उगु हे कथं आःयाउगु हरिभवनय् केन्द्रीय कार्यालय दयकेत्यनागु खः। थीथी कारणं अन याउगु केन्द्रीय भवन दयकेगु सम्भव मन्त।

थौं केन्द्रीय भवन थन शिलान्यास जुगु दु। वयकलं हरिभवनयात बागदरबार धका विवाद हया अन भवन निर्माण मयाकूगु धका धयादीगु खः। मेयर शाक्यं केन्द्रीय भवन आः सुविधासम्पन्न जुइगु जानकारी बियादीगु दु। ‘जिमिसं जिम्मेवारी न्ह्यःतक यक्को वडा कार्यालय भवनय् सेवाग्राहीपिन्स याउक सेवा प्रदान कायेत समस्या जुगु,’ वयकलं धयादीगु दु, ‘आः दक्को वडाय् ई कथं विकास याना यकेमाः। वडा भवन निर्माण यायेगु इलय् मौलिकता खने दइगु व पिने याउगु स्वरुप छगु हे खनेदइगु कथं निर्माण यानाच्वनागु दु। जिमिसं निर्माण यानागु व निर्माण जुयाच्वंगु दक्को वडा भवनया पिने याउगु स्वरुप छगु हे कथं व मौलिकता खनेदइ।’

हरिभवनय् केन्द्रीय कार्यालय दयकेगु योजना दु सा सू मनू तयेगु व्यक्तिगत स्वार्थ तया विरोध याउगु कारण सम्भव मजुगु धका धयादीसे उगु भवनया शिलान्यास याये दया लयतागु दु धका धयादीगु दु। मेयर शाक्यं लानिपूखु, धरहरा, दरबार हाइस्कुल, कमलपोखरी पुर्ननिर्माणया सिलसिलाय् विवाद यापिन्स आः पश्चताप यानाच्वंगु दु धका धयादीगु दु।

उगु ज्याझ्वलय् संघीय सांसद कृष्णगोपाल श्रेष्ठ, उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली लगायतपिन्स न सम्वोधन यानादीगु खः।

महानगरपालिकां बिउगु जानकारी कथं करीब ६ रोपनी क्षेत्रफलय् दयकूगु उगु भवनया भूमिगत तल्लाय् ३० गः गाडी व ८० गः मोटरसाइकलया लागि पार्किङया व्यवस्था दु। भूकम्प प्रतिरोधी उगु भवनय् भवन मापदण्ड कथं जःखः ५ मिटर त्वतताः, भूमिगत तल्लाय् भविष्यय् थप २५ गः गाडी मेकानिकल प्रविधिपाखे थप याये फइगु कथं दु। येँ महानगरया वरिष्ठ इन्जिनियर प्रेमबहादुर श्रेष्ठया कथं, ‘भवनया मोहोडा आधुनिक शैलीइ जुइ।

थुगु भवन ९२ हजार ६८ वर्गफुटय् निर्माण जुइ।’ वयकलं बिगु जानकारी कथं भवन अपाङ्ग व जेष्ठ नागरिकमैत्री जुइ। ‘अपाङ्गता जुपि व जेष्ठ नागरिकया लािग १० म्हेसिगु क्षमताया निगु लिफ्ट दइ,’ ‘थुगु भवन २०८० असोज मसान्त तक सम्पन्न यायेगु कथं ठेक्काया जिम्मा समानान्तर निर्माण सेवा प्रालीं काउगु दु।’ भवनया कार्यादेश ६९ करोड ५८ लाख १९ हजार ३ सय ५९ दु। भवनया डिजाइन सहरी योजना आयोग व सिनर्जी इन्जिनियरिङ प्रालीें तयार याउगु खः।

Categorized in राष्ट्रिय