चितवनया नारायणी खुसिया ताँ तिंन्हुयाः छम्ह मनू बेपत्ता जूगु दु।

नवलपुरया गैंडाकोटपाखें नारायणी ताँ वःम्ह थ्यंमथ्यं ५५ दँया मिजं नं तांया दथू तिंन्हुयाः बेपत्ता जूगु धका प्रहरीं जानकारी बिउगु दु। वडा प्रहरी ज्याकुथि नारायणगढया प्रमुख प्रहरी निरीक्षक रघुसिंह विष्टया कथं तिंन्हुया वंम्ह मिजंया मालेगु ज्या जुयाच्वंसां नं आःतकं लुयावःगु मदुनि ।

खुसिइ लः अप्वःगु व बुलुसे नं च्वंगुलिं आःतक उद्धार ज्या जुयाच्वंसां नं लुयामवःगु विष्टं धाःगु दु । वं तिंन्हुइ न्ह्यः तांमय् तपुली, गञ्जी व निद्वःव स्वसः तका दां त्वःताथकूगु तर मेगु म्हसीका सिइदूगु छुं नं प्रमाण लुयामवःगु प्रहरी निरीक्षक विष्टं धाःगु दु ।

Categorized in राष्ट्रिय