पर्वय् तलेजु भवानीया जनी हिलेगु व सब्बु चान्हय् मत च्याकेगु चलन दु । चः¥हेया कन्हय् न्हिनय् ‘योगिनी शक्ति’ पूजा यानाः जीवित देवी कुमारीयात विशेषकथंया भोजन व जनी छ्वय्गु याइगु खः । बलिया हे हुनिं देगलय् पूजा द्यूगु थ्व न्हापांगु घटना धाःसा मखु । वि.सं. २०१७ सालय् विवाह पञ्चमिइ याइगु पूजा नं द्यूगु खः । उगु इलय् ठेकेदारं इलय् हे बलि उपलब्ध मयाकूगु खः । विवाह पञ्चमिया पुजाय् ७म्ह दुगु, ६म्ह हँय् व म्येय् माः ।

– मोहनिया स्याकुत्याकुकुन्हु यलया पाटन दरबार क्षेत्रय् याइगु कालरात्री पूजा ठेकेदारं बलिया नितिं म्ह्वः तौलया म्येय् ब्यूगुलिं हे थगुने पुजा द्यूगु खः । तलेजु देगःया पुजारीं याइगु पुजाया नितिं ठेकेदारं २१गू निसें २२गू धार्नी दुम्ह म्येय् बीमाःगु व्यवस्था दुगु खः । तर १२गू धार्नीया जक उपलब्ध याकूगु खः ।

 

– अथे हे छकः ठेकेदारया लापरवाहीया हे हुनिं मोहनिया चः¥हेया चान्हय् पाटन दरबार क्षेत्रया मूचुकय् हुइकीगु थेच्वया नवदुर्गा प्याखं महुइकल । प्याखंया नितिं गुथि संस्थानं म्येय् व थुम्बा बीगु व्यवस्था दु । बलिया हुनिं प्याखं वि.सं. २०६९य् बन्द जूगु खः । उगु इलय् बन्द जूगु प्याखं वि.सं. २०७४ सालय् जक हाकनं न्ह्याकूगु खः ।

 

थ्व स्वंगू घटना दसु जक खः । ठेकेदारया लापरवाहीया हुनिं स्वनिगःया अप्वः धइथें जात्रा पर्व बुलुहुँ दिना वनाच्वंगु दु । हनुमानध्वाखास्थित तलेजुया पुजारी उद्धव कर्माचार्यं धयादी, “संस्थानया उद्देश्य बांलाः । तर कर्मचारी ठेकेदार खराब जूगुलिं स्यन ।” वय्कलं ठेकेदार व कर्मचारीयात कारवाही मजूगुलिं लापरवाही अप्वःगु धयादिल । “संस्थानय् राजनीतिक नियुक्तिं नं समस्या जुइगु याः, उकियात बन्द याय्माल” वय्कलं धयादिल, “देगलय् दँय्दसं २४गू तःधंगु व १३गू चीधंगु महत्वपूर्ण पर्व दु । ठेकेदारया हुनिं थुगु पर्वय् तकं लिच्वः लानाच्वंगु दु ।”

 

पाटन दरबारया तलेजु देगःया पुजारी नीरण राजोपाध्यायं थुगुसीया मोहनिया बलि दरबन्दीकथं उपलब्ध मयाकूसा कडा रुपं प्रस्तुत जुइत बाध्य जुइगु चेतावनि बियादिल । गुथि संस्थान, यल शाखा कार्यालय प्रमुख राजन भुजुं दरबन्दीकथंया जिन्सी सामान उपलब्ध याकेगु नितिं इलय् हे ठेकेदारयात उजं बीगु धयादिल । “दरबन्दीइ व्यवस्था दुगु स्वयां म्ह्वः बिल धाःसा कारवाहीया नितिं सिफारिस याय्गु जुइ” वय्कलं धयादिल । यलय् थुगु आर्थिक दँया नितिं दोपाया÷चौपायालिसें पूजा ज्वलं उपलब्ध याकेगु ठेक्का सुरेन्द्र अवालं २२गू लख २०६ तका दामं प्राप्त याःगु दु । अवालं म्येय्, खुम्ह दरबन्दीइ व्यवस्था दुकथं बीगु दावी यानादिल ।

 

जनप्रतिनिधिया आश्वासन हे जक

 

यल महानगरपालिका पाटन दरबार क्षेत्रय् पिदनीगु पायाः जात्रा व्यवस्था मुँज्याय् अप्वः धइथें गुथ्याःतसें जनप्रतिनिधिं आश्वासन जक बीगु धासें कुंखिन । यल महानगरया जनप्रतिनिधिं थगुनेया मुँज्याय् दरबार क्षेत्रलिसे सम्बन्धित जात्रापर्व व्यवस्थितकथं न्ह्याकेत अक्षय कोषया पलिस्था, गुथ्याःतय्गु बिमा व दरबन्दी धेबा ईकथं परिमार्जन याय्गु प्रतिबद्धता प्वंकूगु खः ।

 

खड्गी सेवा समिति यलया नायः अरोजकुमार खड्गीं धर्मयात कयाः दयाच्वंगु आस्थां म्ह्वः धेबां नं धर्म संस्कृति न्ह्याका वयाच्वंगु धयादिल । “थगुने यलया जनप्रतिनिधि थजाःगु हे मुँज्याय् अक्षय कोष, बिमा व दरबन्दी धेबा ईकथं परिमार्जन याय्गु प्रतिबद्धता प्वंकूगु खः । तर पूवंकेगु ज्या मजुल” वय्कलं धयादिल । चालंया चान्हय् जुइगु पायाः जात्राय् खड्गी समुदायं म्येय्या छ्यं क्वबीमाःगु चलन दु । थुकिया नितिं उमित गुथि संस्थानं प्यसः तका जक बिया वयाच्वंगु दु । वय्कलं निगू दशक न्ह्यः कायम जूगु दरबन्दी जनप्रतिनिधि वःगु स्वदँय् नं ईकथं परिमार्जन जुइमफूगु धयादिसें कुंखिनादिल ।

 

ललितपुर उद्योग वाणिज्य संघया नायः कृष्णलाल महर्जनं नं जात्रा पर्वया स्थायी विकास याय्त कोष नीस्वनेमाःगु खँय् बः बियादिल । “थ्व थाकूगु ज्या नं मखु । ललितपुर महानगरया बोर्ड मुँज्यां क्वःछ्यूसा गाः” वय्कलं धयादिल । लिसलय् यल महानगरपालिकाया प्रमुख चिरीबाबु महर्जनं अक्षयकोष, गुथ्याःतय्गु बिमा व दरबन्दी थुगुसी कायम याय्गु प्रतिबद्धता प्वंकादिल । “थगुने बजेट दय्कूबलय् लिबाय् धुंकूगु हुनिं व्यवस्था याय्मफुत” वय्कलं धयादिल । जात्राय् खड्गी खलःया ८म्ह गुथ्याःत खटे जुइमाः ।

 

यल दरबारया मू छेँ अर्थात आगम छेँया पुजारी माधवश्याम शर्मां नं आश्वासन जक बियाः प्रतिबद्धता पूमवंकूगु धासें कुंखिनादिल । “संस्थानं देगः भाडाय् ब्यूगु दु”, वय्कलं धयादिल, “व्यक्तिगत खर्चं जात्रापर्व न्ह्याकेमाःगु बाध्यता दु” यल महानगरया उप–प्रमुख गीता सत्यालं थुगुसी मू छेँ अर्थात आगं छेँ न्ह्याथे यानाः नं पुनर्निर्माण याय्गु धयादिल । “थुकिया नितिं नं बजेट फ्याय्धुंकल” स्मारक संरक्षण तथा दरबार हेरचाह ज्याकू यलया प्रमुख सन्दीप खनालं जात्रापर्व न्ह्याकेगु नितिं माःकथं ग्वाहालि याय्त तयार दुगु धयादिल ।