नेवाः जातीय महासंघं स्वन्ति नखः व न्हूदँ नेपाल सम्वत ११४२ दँया लसताय् भिन्तुना कालबिल ज्याझ्वः याःगु दु ।

ज्याझ्वलय् नवासें महासंघया नायः मनोज नेवाः खड्गीं जातया नां काय्वं साम्प्रदायिक धाइगु प्रवृत्तिं थहांवय्माःगु खँय् बः बियादिल । ‘जात धाय्वं तुं साम्प्रदायिक धाय्गु प्रवृत्ति त्याग याय्माः, झीगु नांया ल्यूने गबलेतक्क थर दइ उबलेतक जात दइ व सकल जातजातिया शक्ति छथाय् मुंकाः देय्यात न्ह्यज्याकेमाः’ नायः खड्गीं धयादिल।

सकल जातीय समाजया प्रतिनिधित्व यानाः नवाय्गु झ्वलय् राजोपाध्याय समाजया नायः संजय शर्मा राजोपाध्यायं सकल जातजातिया शक्तियात संगठित यानाः नेवाः समाजयात बल्लाकेत न्ह्याःवनेमाःगुलि खँय् बः बियादिल ।उगु हे ज्याझ्वलय् महासंघया लोगो नं सार्वजनिक याःगु खः । सकल जातीय समाजया प्रतिनिधिपिन्सं मंकाः कथं लोगो सार्वजनिक यानादीगु खः।

उगु ज्याझ्वलय् नेवाः पत्रकारा राष्ट्रिय दबूया बरिष्ठ उपाध्यक्ष नृपेन्द्रलाल श्रेष्ठ नाप थी थी जातीय संगठन दुजः नाप संचाकःपिनिगु न ब्बति दुगु खः। अथे हे, संचारकर्मीलिसें च्वमि पदम श्रेष्ठं च्वयादीगु सफू ‘जातजाति र संघीयता ः कति ठिक कति वेठीक’ नं उगु हे ज्याझ्वलय् विमोचन याःगु खः ।

Categorized in राष्ट्रिय