दक्कले न्हापां ला महानगर कमिटी गठन विधानसम्मत् जू कि मजू धइगु हे न्ह्यसः आः दनाच्वंगु दु । नेवाः देय् दबूया १११५ संशोधन सहितया विधानय् परिच्छेद ८ या ३० नम्बर बुँदाय् गाउँ÷नगर समिति गठन र अन्य व्यवस्थाया बारे उल्लेख दु । उकी अप्वःलय् ११ दुजःया छगू गां वा नगर समिति गठन याय्फइगु खँ धयातःगु दु । गाउँ÷नगर कार्य समिति निर्वाचित जुइधुंकाः निर्वाचित दुजःमध्ये नं अध्यक्षया प्रस्तावय् समितिं छम्ह न्वकू, छम्ह छ्यान्जे, छम्ह ल्यू छ्यान्जे, छम्ह दांभरिंया भाला क्वःछीगु खँ नं दबूया विधानय् हे उल्लेख दु । आः पदाधिकारीया अवस्था स्वय्बलय् येँ महानगर समितिइ खुम्ह न्वकू तःगु दु । छ्यान्जे व ल्यू छ्यान्जे धाःसा छम्ह छम्ह हे जक खः । मेपिं वडा प्रतिनिधि धकाः २६म्हेसित समितिइ तःगु दु । वडा प्रतिनिधियात नं समिति दुजः कथं काय्बलय् ला अप्वःलय् ११ दुजः दइगु नगर कमिटिइ २६ वडा प्रतिनिधि व ९ पदाधिकारी नं याय्बलय् ३७ म्ह थ्यंवन ।

उकिया नापं निर्वाचित अध्यक्ष व ७ दुजःया वैठकं जातीय संस्था, ल्यूने लाःगु समुदाय व ३३ प्रतिशत मिसालिसें अप्वःलय्३ मनोनित याय्फइगु व्यवस्था नं दु । मनोनितया प्रकृया छु जुइ धइगु स्पष्ट धाःसा मदु । जातीय संस्था धाःगुलिइ जातीय संस्थाया प्रतिनिधि सुनां सिफारीस याइगु खः ? देय् दबुलिइ हे दुगु जातीय परिषदं सिफारीस याइगु खः वा जातीय संघसंस्थापाखें सिफारीस याइगु खः स्पष्ट मदु । जातीय परिषदयात केन्द्रीय सदस्यया जक हैसियतय् तःगु धासें असन्तुष्ट जूगु पुचः मुनाः हे नेवाः जातीय महासंघ गठन याःगु धइगु खँ नं दनाच्वंगु दु । छखे जातीय परिषदयात उचित थाय् मब्यूगु धइगु असन्तुष्टि सा मेखे जातीय संघसंस्थाया स्थानया खँय् देय् दबूया अस्पष्टता । अथे हे, मिसा प्रतिनिधिया सवालय् नं गुकथं सिफारीस जुइ वा मनोनित याइ धइगु नं स्पष्ट मदुनि ।

थुकिया नापं देय् दबुलिइ राजनीतिक रंग कित धइगु आरोप नं इलय्ब्यलय् वय्गु याः । न्हापा दाङ अधिवेशनय् नं नेकपा एमालेंपाखें हे ह्वीप जारी यानाः त्याकावःगु धइगु आरोप वःगु खःसा आः महानगर समितिइ जनता समाजवादी पार्टी हावी खनेदत । समितिया अध्यक्ष जूम्ह शोभा महर्जन बज्राचार्य हे जसपा पार्टीया नेतृ खःसा वय्कःनापं खुम्ह न्वकूमध्ये निम्ह ला जसपा पार्टीयापिं हे दु । वडा प्रतिनिधिइ नं व हे कथं जसपाया कार्यकर्तात दुथ्यानाच्वंगु दु ।

देय् दबूया संगठन विस्तार जुल, बांलाःगु खँ खत तर, थीथी समिति गठन याय्त जूगु भेलाया बारे नेवाःतय्सं हे मसीगु, समिति गठन जुइधुंकाः सामाजिक संजालमार्फत जक जानकारी दइगु, नेवाः संचारकर्मीतय्त तक हे छुं कथं जानकारी मदइगु धइगु बांलाःगु छुमा पक्कां हे मखु । थ्वयां न्ह्यः नं दांभरिं अन्जिता खड्गीयात पदं चीकूबलय् नं थ्व विषय जिल्ला प्रशासन कार्यालय, येँय् तक हे थ्यंगु खः । उगु विषयस नं २०७६ असार १९ गतेया दिनय् येँ जिप्रकां दांभरिं पदय् जिम्मेवारी हेरफेर याय्गु निर्णय कार्यान्वयन मयाय्त फैसला न्यंकूगु खः । थ्व धइगु देय् दबूया कार्य समिति वैठकं प्रकृयायात मल्यूसे थः यत्थे निर्णय याःगु खः धकाः प्रमाणित जूगु धाय्फइ । अथे हे, अध्यक्षं आःतक याःगु दक्वं खर्च व खर्चया रकम पुष्टि याइगु भ्वं अले सम्झौता तकं तयाः लेखा परिक्षण याकाः कार्य समिति व साधारण सभां अनुमोदन याकाः लच्छि दुने प्रतिवेदन न्ह्यब्वय्त नं जिप्रकां धाःगु खः । उकिया नापं संस्थाया विधान लोकतान्त्रिक प्रकृति व आःया संस्थाया ढाँचा कथं मजूगु धासें जिप्रकां लच्छि दुने विशेष साधारण सभा÷साधारण सभां विधान संशोधन यानाः स्वीकृतिया लागिं पेश याय्त उजं ब्यूगु खः । देय् दबुलिं आःतक थ्व ज्या पूवंकेमफुनि । थज्याःगु थज्याःगु विषय धइगु झी नेवाःतय्गु नितिं बांलाःगु, भिंगु खँ मखु । राष्ट्रिय संगठन विधि व प्रकृया दुने मदु धकाः मेपिनिगुपाखें न्यनेमाःगु धइगु झी सकसिगु नितिं मछालापुस्सेच्वंगु खँ खः । देय् दबुलिं थज्याःगु पक्षय् गम्भीर रुपं बिचाः यानाः न्ह्यज्याःसा बांलाः।