इन्धनया भाः हाकनं थहाँवन, पेट्रोल, डिजेल व मट्टितेल २/२ तकाः थहाँवन
लहनान्यूज | चिल्लागा, अष्टमी ११४१, चैत्र २३ गते सोमबाः
नेपाल आयल निगमं हाकनं पेट्रोलियम पदार्थया भाः थकाःगु दु । निगमं छगू सूचं पिथना आइतबाः चान्हेनिसें लागू जुइकथं पेट्रोल, डिजेल व मट्टितेलया भाः थकाःगु खः ।
निगमया कथं डिजेल, पट्रोल व मट्टितेलया भाःलय् प्रतिलिटर २÷२ तका ध्येबा थकाःगु खः । थहाँवंगु भालिसें आः पेट्रोल प्रतिलिटर सच्छि व २० तका, डिजेल व मट्टितेल प्रतिलिटर सच्छि व ३तका ध्येबा कायम याःगु दु ।
जा थुइगु एलपी ग्यास व हवाई इन्धनया खुद्रा बिक्री भाः धाःसा अथेंस्तु हे तःगु दु । अप्रिल १ तारिखय् इन्डियन आयल कर्पोरेशनं छ्वयाहःगु भाः कथं हे भाः समायोजन याःगु खः ।
भाः समायोजन मजुबलय् निगमयात लाय् छगू अर्ब गुंगु क्वःति ध्येबाया घाटा जुइगु निगमं न्ह्यथंगु दु । निगम कथं भाः समायोजन धुंका नं पेट्रोलय् प्रतिलिटर न्हेतका व ३९ पैसा, डिजेलय् छतका व ९४ पैसा ध्येबा व जा थुइगु एलपी ग्यासय् प्यस व १८ तका ४७ पैसा घाटा जुया थ्यंमथ्यं ८८ क्वःति बराबरया ध्येबा घाटा जुयाच्वंगु धाःगु दु ।
एलपी ग्यासं जक निगमयात १५ दिंलय् ६० क्वःति व १३ लखः ध्येबा घाटा जुयाच्वंगु निगम उगु सूचंले न्ह्यथनातःगु दु । घाटा ध्येबा भाः स्थिरीकरण कोष लिसें निगमया सञ्चित नाफां व्यवस्थापन जुइगु धाःगु दु ।
भारतीय सीमा रक्सोललिसे स्वाःगु नेपाःया वीरगञ्ज क्षेत्रय् पेट्रोलय् ३० तका व ४७ पैसा व र डिजेलय् प्रतिलिटर ३६ तका ६३ पैसा नेपालपाखे हे इन्धनया भाःलय् म्हो खः ।
