प्रधानमन्त्री केपी शर्मा ओलीं कोरोना भाइरसविरुद्धया खोप कयादिल
लहनान्युज | सिल्लागा नवमी ११४१, फागुन २३ आइतवाः
प्रधानमन्त्री केपी शर्मा ओलीं थौं कोरोना भाइरसविरुद्धया खोप कयादिल ।
वय्कलं शिक्षण अस्पतालय् झाया खोप कया निगूगु चरणया खोप अभियान न्ह्याकादिल । संवैधानिक निकायया प्रमुखतय्सं नं थौं हे खोप कायेगु ज्याझ्वः दु ।
सरकारं थौंनिसें ६५ दं च्वय्या १६ लख स्वयां आपाः ज्याथः नागरिकपिन्त कोरोना विरुद्धया खोप बीगु ज्याझ्वः न्ह्याकेत्यंगु खः । थुगु चरणय् शिक्षक, सवारी चालक व सहचालकयात तकं कोरोनाया खोप बी ।
थ्वयां न्ह्यः ५५ दं च्वय्या दक्वं नागरिकयात खोप बीगु निर्णय यायेधुंकाः खोप मगाःगुलिं ६५ दं च्वय्या नागरिकयात जक खोप बीगु निर्णय जूगु खः । स्वास्थ्य मन्त्रालयया कथं निगूगु चरणया खोप अभियान न्ह्याकेत ६ द्वः खोप केन्द्र स्थापना याःगु दु ।
सरकारं भारतया सिरम इन्सटिच्युटं उत्पादन याःगु कोभिशिल्ड खोप बियावःगु दु । थ्वयां न्ह्यः माघ १४ गतेनिसें न्ह्याःगु न्हापांगु चरण फ्रन्टलाइनय् ज्या याइपिं ४ लख २९ द्वः स्वयां आपाःसिनं कोरोनाया न्हापांगु डोज कायेधुंकूगु दु । भारतं नेपालयात १० लख डोज खोप सितिकं ब्यूगु खः ।
थ्वहेदथुई विश्व स्वास्थ्य संगठनं चूलाकूगु कोभ्याक्स सुविधा अन्तर्गतया ३गु लख ४८द्व डोज कोरोनाविरुद्धया खोप थौं न येँ थ्यंकवइगु जूगु दु । भारतया सिरम कम्पनीं उत्पादन याःगु खोप थौं येँ थ्यनीगु धागु दु ।
थ्वसिवे न्ह्यः न खोप हयेधुंकूगु दु । थ्व खोप बेलायतया अक्सफोर्ड विश्वविद्यालय व अस्ट्राजेनकां विकास याःगु खः । कोभ्याक्स सुविधा अन्तर्गत नेपालं २०गु प्रतिशत नागरिकपिन्त गाक्क छगु कोती ३०गु लख डोज खोपयात थीथी चरणय् निःशुल्क तयेकी ।
