दाहाल–नेपाल पुचलं नरभंक्षी आन्दोलन याःगु ख ः प्रधानमन्त्री ओली
राम डंगोल | पोहेलागा अष्टमी ११४१, माघ २३ शुक्रवाः
प्रधानमन्त्री एवं सत्तारुढ नेपाल कम्युनिष्ट पार्टी नेकपाया नायः केपी शर्मा ओलीं पार्टीया आधिकारिताया खँय् थौंनिसें विवाद मदूगु धयादिल ।
वृहत जनसभाय् सम्बोधन याना ओलीं धयादिल, “थौंनिसें सुयागु पार्टी आधिकारिक खः धयाच्वनेमाःगु मदु, आ थ्वः सभा स्वयेधुंका स्वतः आधिकारिता पुष्टि जुइधुंकल” ।
विहीबाः दाहाल–नेपाल पुचलं याःगु नेपाल बन्दय् मिं नःगु ट्याक्सीया क्षतिपूर्ति सरकारं बिइगु प्रधानमन्त्री धयादिल । वय्कलं धयादिल, “उमिसं हिंसा याई, जिपिं जनताया पक्षय् दु, उकिं सरकारं क्षतिपूर्ति बिइ ।”
अथेहे प्रधानमन्त्री ओलीं दाहाल–नेपाल पुचलं नरभंक्षी आन्दोलन याःगु द्वपं बियादिल । पुष्पकमल दाहालं शाकाहारी आन्दोलन यायेमफइगु आः मांसाहारी आन्दोलन यायेमाःगु धाःगु धापूया लिसःलय् प्रधामन्त्री ओलीं उपिं नरभंक्षी जूगु प्रष्ट जूगु धयादिल ।
ओलीं धयादिल, “बन्दय् गरिब, श्रमजीवीया लागि ज्याय याये धाइपिन्सं तरकारी वान्छ्वयाबिल, गरिब ट्याक्सीवालाया ट्याक्सी च्याकाबिल, ड्राइभर तकं च्याकेत स्वःपिं सर्वहारावादी जुईला ?” धैगु न्ह्यसः तयादिल ।
अथेहे प्रधानमन्त्री ओलीं थौंया जनसभा इतिहासया हे दकले तःधंगु सभा जूगु धयादिल । वयक्लं आःतक थुथि तःधंगु जनसभा गबलें जुईपूmगु मदुगु धासें दक्व जनसभाय् ब्वतिकापिन्त सुभाय् देछानादिल ।
जनसभाय् ओली पक्षीय नेकपा सचिवालय दुजः ईश्वर पोखरेलं सूर्य चिं केपी शर्मा ओली नेतृत्वया पार्टीयात हे दइगु ठोकूवा यानादिल ।
अथेहे गृहमन्त्री रामबहादुर थापा (बादलं) मांसाहारी आन्दोलन याइपिन्त चिडियाखानाय् यंका बन्द यायेगु चेतावनी बियादिल । दाहाल–नेपाल पुचया नायः पुष्पकमल दाहालं छुं दिं न्ह्यः देशय् मांसाहारी आन्दोलन यायेमाःगु धाःगु खः ।
मांसाहारी आन्दोलन संविधान व कानून नं अपराध जूगु धासें देय् निर्वाचनया नितिं न्ह्यज्याय्धुंकुगु धयादिल ।
प्रधानमन्त्रीया सिफारिसय् राष्ट्रपति विद्या भण्डारीं संसद विघटन यायेधुंकाः नेकपा निकू कुचा जूगु दु । व धुंकाः निगुलिं पुचलं सडक प्रदर्शन व मुनायात तच्वयेकूगु दु ।
लिपांगु इलय् संवैधानिक परिषद्या सिफारिसय् राष्ट्रपति ज्याकुथिं संसदीय सुनुवाई विना हे संवैधानिक आयोगय् नियुक्ति यायेधुंकाः म्हिगः दाहाल–नेपाल पुचलं आम हड्ताल हे याःगु खः ।
