पार्टी कचवं अन्त्यया नितिं ओली व नेपाल नापलात
लहनान्यूज | चौलाथ्व नवमी ११४१,बैसाख ८ बुधवाः
सत्तारुढ दल नेकपा एमाले ब्वथलिइगु अवस्थाय् एमाले नायः एवं प्रधानमन्त्री केपी शर्मा ओली व एमाले वरिष्ठ नेता माधवकुमार नेपाल दथुई सहलह जूगु दु ।
निम्ह नेता दथुई थौं सनिलय् नागपोखरीया होटल मारियटय् थ्यंमथ्यं निघौ वार्ता जूगु दु । अर्थमन्त्री विष्णु पौडेलया तकं ब्वति दूगु उगु वार्ता वय्कया छुं ई वार्ता जुई धुंका पिहाँझाःगु खः ।
थ्वः लिपाः ओली व नेता नेपाल दथुई याकः याकः सहलह जूगु खः । वार्ता लिपाः निम्हं नेतां प्रतिक्रिया धाःसा बियामदि । नायः ओलीं पार्टी हीत अःखः ज्याझ्वः याःगु द्वपनय् नेता नेपाललिसें २७म्ह सांसदपिन्त स्पष्टिकरण न्यनेगु कारबाहीया प्रक्रिया न्ह्याकेत्यंगु खः ।
थ्वहे ईलय् थौं सुथय् ल्याम्हम्ह नेता योगेश भट्टराईं प्रधानमन्त्री ओलीलिसे नापलाना पार्टी ब्वथलेगु पाखें ल्यंकेत इनाप यासेंलि ओली व नेपाल दथुई उगु संवाद संभव जूगु खः ।
