येँया २३ वडाया दुने ओमवहाः त्वाः छेँ छगु ज्याझ्वः दथुइ थौं येँ महानगरपालिकाया मेयर बिद्यासुन्दर शाक्यं शिलान्यास यानादीगु दु । उगु ज्याझ्वलय् मेयर शाक्यं येँ महानगर दुने गुलि न आँगः छेँ, द्यः छेँ, क्वाःपाः छेँ नाप सम्पदा थःपिनिगु कार्यकालय् दयेकेगु धका धयादीगु दु । बिकासया ज्याय् सुना नं पंगः मथेस्या न्ह्या वनेमाःगु खँय् बः बियादीगु दु ।

मेयर शाक्यं महानगरपालिकाया दुने बजेतया समस्या मदु सुयाःगु न द्यः छेँ, क्वाःपाः छेँ, आगः छेँ नाप गुथिया छेँ नेवाः परम्परा कथं दयेकेगु लागि महानगर न्ह्यावलय् न तयार दु धका धयादीगु दु । वयकलं न्हापा कमलपूखु दयेकेगु लागि सकसिगु सहमति ज्या न्ह्याःगु खः आः राजनैतिक बिचार प्रभावित जुया बिरोध जुगु दुर्भाग्य खः धका धयादीगु खः।

अथेहे येँ महानगरपालिका २३ वडाध्यक्ष मचाराजा महर्जनं थुगु कार्यकालय् मेयर बिद्यासुन्दर शाक्यपाखे यक्वो बालगु ज्या जुगु दु धका धयादीसे मेगु छगु कार्यकाल न वयकःयात झीसं मेयर यायेत झी न्ह्यने वनेमाः धका धयादीगु खः। वयकलं थुगु निर्माण जुइ त्यःगु त्वाःछेँया आःयाःगु बजेत प्रयाप्त मजूसा मेगु बजेतय् तयेगु लागि पहल यायेगु धका धयादीगु खः।

राजु महर्जन न्ह्याकादीगु उगु ज्याझ्वलय् त्वाःछेँया नायः बाबुराजा ज्यापू, २३ वडाया सदस्यपि ज्योति शाक्य, गोपाल नापितपिनिगु न उपस्थिति दुगु खः। उगु त्वाः छेँ ३ आना जग्गाय् निर्माण जुइ त्यःगु खःसा येँ महानगरं १ करोड व ५० लाखया बजेतं दच्छि दुने सम्पन्न यायेगु कथं ज्या जुइत्यःगु खः धका राजु महर्जन जानकारी बियादीगु दु ।

महर्जन थुगु छेँया निति जग्गा न्यायेगु त्यासाया कथं गुथियारपाखे म्हति न ५० हजार तयेमाःगु यानागु खः धका धयादीसे जग्गाया निति १३ लाख तक तयेगु ज्या तक जुगु दु धका धयादीगु खः। आःतक गुथियारपाखे बिःगु ऋण कथं आःतक ४३ लाख लित बिइ धुकागु दु धका महर्जन जानकारी बिःगु दु।

Categorized in राष्ट्रिय