दिल्लीया सरकारं अक्सिजन अभाव मजुइकेत विदेशं हइगु जुल
लहानान्युज | चौलागा पारु ११४१,बैसाख १५ बुधवाः
भारतया दिल्ली सरकारं विदेशं अक्सिजन हयेत्यंगु जूगु दु । कोभिड–१९ या संक्रमितया ल्या अप्वयेवं अक्सिजन अभाव मजुइकेत दिल्लीया सरकारं विदेशं अक्सिजन हयेत्यंगु खः ।
दिल्लीया राज्य सरकारं थःगु राज्यया नितिं बैंककं १८गः ट्यांकर परिमाणया अक्सिजन आयात यायेगु निर्णय याःगु दु । अक्सिजन ज्वनाः थौंनिसें ट्यांकरत दिल्ली थ्यनीगु मुख्यमन्त्री अरविन्द केजरीवालं जानकारी बियादिल ।
मुख्यमन्त्री केजरीवालं बैंककं अक्सिजनया ट्यांकर हयेत केन्द्र सरकारनाप एयरफोर्स विमान चूलाकेत इनाप यानादीगु खः । दिल्ली सरकारं फ्रान्सं न २१गु थत्थें छ्यलेफइगु यानाः अक्सिजन प्लान्ट हयेत्यंगु दु ।
भारतय् न्हियान्हिथं स्वंगु लख मनूतय्त कोरोना संक्रमण जुयाच्वंगु दु । संक्रमित जूपिनिगु ल्या अप्वयेवं अस्पताल भर्ना जूपिं मध्ये ९०गु प्रतिशत संक्रमितपिन्त अक्सिजन बिइमालाःच्वंगु दु ।
अथेजुयाः न दिल्लीइ अक्सिजनया अभाव जूगु खः । थौंनिसें बैंककं भारतया दिल्लीइ अक्सिजन थ्यनीगु जुइवं अक्सिजन अभावया समस्या थत्थेंया नितिं आंशिक रुपय् ज्यनीगु विश्वास यानातःगु दु ।
Categorized in अन्तर्राष्ट्रिय
