प्रधानमन्त्री केपी शर्मा ओलीं सतादिल सर्वदलीय मुँज्या
लहनान्यूज | चौलाथ्व पञ्चमी ११४१, वैशाख ४ शनिबाः
प्रधानमन्त्री केपी शर्मा ओलीं सर्वदलीय मुँज्या सःतादीगु दु ।
प्रधानमन्त्री ओलीं कोरोना भाइरसया महामारी व समसामयिक राजनीतिक विषयस सहलह यायेत थौं सुथय् ११ता इलय् सर्वदलीय मुँज्या सःतादीगुु वयेकया प्रेस सल्लाहकार सूर्य थापां जानकारी बियादील । थ्वहे दथुइ प्रधानमन्त्री ओली व नेकपा माओवादी केन्द्रया नायः पुष्पकमल दाहाल दथुइ म्हिगः टेलिफोन वार्ता जूगु दु ।
यलःया कोन्ज्योसोम गाँँपालिकाया भवन उलेज्या ज्याझ्वस नायः दाहालं थःपिन्त प्रधानमन्त्री ओलीं ताः ई लिपा फोन याःगु जानकारी बियादील । प्रधानमन्त्री ओलीया फोन वयेधुंका न्वचू क्वपाला वयेक ज्याझ्व लागापाखें पिहाँँझायादीगु खः ।
थुखे प्रधानमन्त्रीया सचिवालयं धाःसा प्रधानमन्त्री ओलीं सर्वदलीय मुँज्याया नितिं ब्वनेत नायः दाहालयात फोन यानादीगु धाःगु दु । सर्वोच्च अदालतं नेकपा एकता बदर याना एमाले व माओवादी केन्द्रयात पुलांगु हे अवस्थाय् लितहयाबिइधुका निम्ह नेता दथुइ भेटवार्ता जूगु मदुनि ।
