प्रधानमन्त्री कप मिजं राष्ट्रिय क्रिकेटया सेमिफाइनल कासा थौंनिसें
पोहेलाथ्व चतुर्दशी ११४१, माघ १४ बुधवाः
प्यंगूगु संस्करणया प्रधानमन्त्री कप मिजं राष्ट्रिय क्रिकेटया सेमिफाइनल कासा थौंनिसें न्ह्याइगु जूगु दु । न्हापांगु सेमिफाइनलय् थौं एपीएफ व नेपाल पुलिस क्लबदथुइ धेंधेंबल्ला याइ ।
एपीएफ पुचः ‘ए’ या त्याकूमि जुयाः सेमिफाइनल थ्यंबलय् पुलिस पुचः ‘बी’ या उपविजेताया कथं सेमिफाइनलय् थ्यंगु दु ।
पुचः ‘ए’ लय् मेगु विभागीय क्लब त्रिभुवन आर्मीनाप म्हिते न्ह्यः हे मदिक्क स्वंगु कासा त्याका लिपांगु प्यंगूगु थाय् पक्का याःगु एपीएफं आर्मीयात बुकाः पुचः त्याकूमि जूगु दु ।
थ्वसिवे न्ह्यः एपीएफं कर्णाली प्रदेश व प्रदेश १ अले गण्डकी प्रदेशयात बुकूगु दु । पुचः ‘ए’ या प्यंगुलिं कासा त्याकाः एपीएफं ८गु ल्या मुंकाः अपराजित यात्रा याःगु दु ।
साविक त्याकूमि पुलिस न्हापांगु कासा वाग्मतीनाप बूगु खः । पुलिसं लिपांगु कासातक प्रदेश २ यात बुकाः सेमिफाइनलया यात्रा क्वःछ्यूगु खः । पुलिसं सुदूरपश्चिम प्रदेश व लुम्बिनी प्रदेशयात बुकूगु खः ।
पुचः ‘बी’ लय् पुलिसं प्यंगु मध्ये ३गु कासा त्याकाः ६गु ल्या मुंकूगु दु ।
Categorized in कासा
