प्रधानमन्त्री कप क्रिकेटय् थौं पुचः झ्वया लिपांगु कासा
पोेहलाथ्व द्वादशी ११४१, माघ १२ सोमबाः
प्रधानमन्त्री कप मिजं राष्ट्रिय क्रिकेट धेंधेंबल्लाय् थौं पुचः झ्वया लिपांगु निगू कासा जुइत्यंगु दु । पुचः ‘ए’ लय् दूगु निगू विभागीय टोली एपीएफ व त्रिभुवन आर्मी क्लब दथुइ किपुलिइ च्वंगु ख्यःलय् कासा जुइ ।
अथेहे पुचः ‘बी’ लय् दूगु नेपाल पुलिस क्लब व प्रदेश–२ दथुया कासा मुलपानी क्रिकेट ख्यःलय् जुइ । पुचः ‘ए’ पाखें एपीएफ व आर्मी थ्वयान्ह्यः हे मदिक्क ३गू कासा त्याका सेमिफाइनलय् थ्यनेधुंकुगु दु ।
अथे जूगुलिं थौंया कासा पुचः त्याकुमि जुइगु नितिं निर्णायक जुइ । एपीएफं व आर्मीं पुचः झ्वलय् गण्डकी, कर्णाली व प्रदेश–१ यात बुकुगु खः ।
थुगु पुचःया त्याकुमिं सेमिफाइनलय् पुचः बीया ल्युत्याकुमिलिसे म्हितिइ । अथेहे पुचः ल्युत्याकुमिं धाःसा पुचः ‘बी’या त्याकुमि जुइधुंकुगु बागमती प्रदेशलिसे म्हितिइ ।
थुखे पुचः ‘बी’पाखें बागमति प्रदेश ४गू कासां ७ गू ल्याः मुना पुचः त्याकुमिया कथं सेमिफाइनल थ्यनेधुंकुगु । अथे जूगुलिं पुलिस व प्रदेश–२ दथुया कासापाखें सेमिफाइनल थ्यनिगु २गूगु टोलीया क्वजिइज्या जुइ ।
न्हापांगु कासाय् हे बागमतिलिसे बूगु पुलिसं सुदूरपश्चिम व लुम्बिनी प्रदेशयात बुका ३गू कासां ४ गू ल्याः मुंगु दु । अथेहे ४ गू कासा म्हितेधुंकुगु लुम्बिनी प्रदेश ५गू ल्याः नापं पुचः ‘बी’ लय् निगूगु थासय् दु ।
Categorized in कासा
