प्रधानमन्त्री केपी शर्मा ओली कञ्चनपुर झाइगु, थ्वहे वालय् प्यंगु औद्योगिक क्षेत्र शिलान्यास याइगु
सिल्लाथ्व दशमी ११४१, फागुन १० सोमबाः
प्रधानमन्त्री केपी शर्मा ओली थौं सुदूरपश्चिम प्रदेशया कञ्चनपुर झायेत्यंगु दु । दैजी छेला औद्योगिक क्षेत्रयात शिलान्यास यायेत प्रधानमन्त्री ओली कञ्चनपुर झायेत्यंगु खः ।
कञ्चनपुरया वेदकोट–२ व ३ य् दैजी छेला औद्योगिक क्षेत्र स्थापना जुइत्यंगु दु । शिलान्यास ज्याझ्वःया औपचारिक समारोह धाःसा वेदकोट–२ स्थित झरना कासा ख्यलय् जुइ ।
अथेहे सरकारं थ्वहे वालय् प्यंगु औद्योगिक क्षेत्र शिलान्यास याइगु ज्याझ्वः क्वःज्यूगु दु । उद्योग वाणिज्य तथा आपूर्ति मन्त्री लेखराज भट्टं ११ गते बाँकेय् नौबस्ता औद्योगिक क्षेत्र शिलान्यास याइगु जूगु दु ।
अथेहे अर्थमन्त्री विष्णु पौडेलं १३ गते रुपन्देहीइ मोतीपुर औद्योगिक क्षेत्र व उद्योग वाणिज्य तथा आपूर्ति मन्त्री लेखराज भट्टं हे १७ गते मकवानपुरय् मयुरधाप औद्योगिक क्षेत्र शिलान्यास याइगु जूगु दु ।
थ्वहेदथुइ प्रधानमन्त्री ओलीं गृहजिल्ला झापाया दमकय् चीन–नेपाल मैत्री औद्योगिक पार्क शिलान्यास याइगु धागु दु ।
Categorized in राजनीति
