महामारी कजय् कायेत सरकारं न्ह्याकागु ज्याय् साथ बिइत प्रधानमन्त्री ओलीया इनाप
लहानान्युज | चौलागा अष्टमी ११४१,बैसाख २० सोमवाः
प्रधानमन्त्री केपी शर्मा ओलीं कोरोना भाईरसया निगूगु झ्वःलं ब्वलनावःगु महामारीयात कजय् कायेया नितिं सरकारं न्ह्याकाच्वंगु ज्याःयात ग्वहालि यायेत दक्वः पक्षलिसें आह्वान यानादिगु दु ।
थौं न्हिनय् देशवासीया नामय् सम्बोधन यासें प्रधानमन्त्री ओलीं वंगु दँयया महामारीं यक्वः हे खँ स्यनेधुंकूगु धासें संक्रमणया निगूगु झ्वःलं ब्वलंकूगु संकटलिसे ल्वाय्त सरकार न्ह्याकाःगु ज्याय् दक्व सर्वसाधारणपिनिगु साथ व ग्वहालिया नितिं इनाप यानादिगु खः ।
प्रधानमन्त्री ओलीं महामारीं यक्व हताहत मजुइक धकाः देशय् च्वंगु सरकारी लिसें निजी क्षेत्रपाखें न्ह्यानाच्वंग्ु तःधंगु अस्पतालतयेत कोभिड अस्पताल दयेकिगु निर्णय जूगु जानकारी बियादिल ।
प्रधानमन्त्री ओलीं वासः यायेत माःगु जनशक्तिया मगामचाः मजुइकेत १दँया करारय् चिकित्सक लिसें स्वास्थ्यकर्मी भर्ना यायेत इनाप यासें वासः यायेगुलिइ स्वापू दूपिं व शव ब्यवस्थापन लिसें सफाइ कर्मचारीपिन्त खाइपाई वयाच्वंगु सुविधाय् ५०गू प्रतिशत थपू यायेगु धयादिल ।
वय्कलं अक्सिजन प्लान्ट त दयेकेज्या जुयाच्वंगु धासें एन्टी भाइरल वासःलिसें मेमेगु जीवनदायी वासःया मौज्दात तयेत अस्पतापिन्त इनाप यानादिगु दु ।
अथेहे अक्सिजनया निर्यात, अनावश्यक भण्डारण लिसें वासःया कालोबजारी याइपिन्त कडा कारबाही यायेगु चेतावनी तकं बियादिगु दु ।
सरकारं भारत, चीन व रुसलिसेंया देशं खोप न्यायेत निरन्तर कुतः यानाच्वनागु जानकारी नं बियादिल ।
