संसद पुनःस्थापना जूसा आन्दोलनय् वनेगु सर्वोच्चयात प्रधानमन्त्री ओलीया ख्याच्वः
लहनान्यूज | सिल्लाथ्व नवमी ११४१, फागुन ९ आइतवाः
प्रधानमन्त्री केपी शर्मा ओलीं अदालतं संसद पुनःस्थापना जूसा आन्दोलनय् वनेगु ख्याच्वः बियादीगु दु ।
विराटनगरय् ग्वसाःग्वःगु थः पक्षीय मुनायात म्हिगः सम्बोधन यासें वयेकलं छुं नं कथंया जालझेल, षड्यन्त्र तिगडम, सेटिङ छुं जुया देय् व जनताया विपक्षय् फैसला जूसा आन्दोलन न्ह्याइगु ख्याच्वः बियादील ।
प्रधानमन्त्री ओलीं प्रतिनिधिसभा विघटनय् सर्वोच्च अदालतं मेगु कथंया फैसला याइ धइगु कल्पना तकं याये मफइगु उल्लेख यानादील ।
छुं नं हुनिं प्रतिनिधि सभा पुनस्र्थापना जुल धाःसा सांसद न्यायेमिइगु, सरकार दयेकेगु क्वदयेकेगु कासा जुइगु व थुकिं लोकतन्त्रयात कमजोर दयेकिगु वयेकया जिकिर खः । अदालतपाखे ख्याच्वःलं जाःगु भाय् छ्यला प्रधानमन्त्री ओलीं सर्वोच्च अदालतं देय्यंक जुयाच्वंगु थुकथंया सभायात स्वयाच्वंगु जुइमा , सभापाखे प्रकट जूगु जनताया अभिमत स्वगु जुइमा धयादील । वयेकलं सर्वोच्चं संविधानया मर्म व भावनायात स्वया देय् गुखे वनिइ धइगु विश्लेषण यानाच्वंगु जुइमा धयादील ।
ओलीं प्रधानमन्त्रीयात चुनाव याकेगु अधिकार दूगु धासें चुनाव वैशाखय् हे व थःपिन्सं नेतृत्व याःगु नेकपां हे बहुमत हइगु दाबी यानादील ।
संवोधनया झ्वलय् प्रधानमन्त्री ओलीं उपराष्ट्रपति नन्दबहादुर पुनं सरकारया कुँख्यंगु व सभामुख अग्निप्रसाद सापकोटां किर्ते याःगु व सरकारविरुद्ध मुद्दा तःगु धका तँ प्वंकादील । वयेकलं प्रचण्ड क्वचाइगु लँपूइ न्ह्यज्यागु जिकिर यासें न्हापा वैद्य नापं च्वंगु, अनलिं डाक्टर नापं न्ह्यागु व डाक्टरं नं त्वःतेधुंका आः झाक्री नाप थ्यंगु धासें ध्याचु नकादील । निगू ४गू सिटय् लिकुंम्ह प्रचण्डयात न्यकु व सपः तयाबिइधुंका आः थःपिन्त न्हंका बिइ धका न्ह्यज्यागु वयेकया धापू खः ।
सभायात सम्बोधन यासें नेता सुवासचन्द्र नेम्बाङं निर्वाचनया खँय् जनतां फैसला यायेधुंकाुगु धासें अदालतं नं संसद विघटनया निर्णय लितमकाइगुलिइ थःपिं विश्वस्त दूगु धयादील ।
अथेहे गृहमन्त्री रामबहादुर थापां दाहाल–नेपाल पुचःलं छुं मन्त्रीत ओली पुचःयात त्वःता थःपिं पाखे वयाच्वंगु दु धका भ्रम न्यंकुगु धयादील । थ्ुखे, प्रधानमन्त्री ओलीविरुद्ध अनेरास्ववियू दाहाल–नेपाल पुचः ब्वंमितयेसं विराटनगरय् हाकुगु ध्वाँय् क्यंगु दु । प्रहरीं हाकुगु ध्वाँय् लाकाकायेधुंका प्रधानमन्त्री ओलीं याःगु असंवैधानिक पलाःया विरोध यासें ब्वंमितयेसं नाराबाजी याःगु खः । ब्वज्याय् कुहाँवःपिं छुं मनूयात प्रहरीं नियन्त्रणय् काःगु खः ।
Categorized in राजनीति
