आयोगय् वना प्रधानमन्त्री ओलीं निर्वाचन प्रक्रिया न्ह्याकेत इनाप
लहनान्युज | पोहेलागा त्रयोदशी ११४१, माघ २७ मंगलवाः
प्रधानमन्त्री केपी शर्मा ओलीं वइगु निर्वाचन केन्द्रीत जुया तयारी निरन्तर न्ह्याकेत निर्वाचन आयोगयात इनाप याःगु दु ।
सरकारं बैशाख १७ व २७ गते घोषणा याःगु मध्यावधि निर्वाचनया तयारीबारे जानकारी कायेत थौं आयोगया ज्याकू कान्तिपथ झाःगु खः । वय्कलं निर्वाचनया तयारीया ज्या निरन्तर न्ह्याकेत इनाप यानादिल ।
प्रधानमन्त्रीलिसेया सहलहय् प्रमुख निर्वाचन आयुक्त दिनेशकुमार थपलियां आयोगं निर्वाचिनया नितिं यानाच्वनागु तयारीबारे जानकारी बियादिगु खः । प्रधानमन्त्री ओलीं आयोगं यानाच्वंगु तयारी सन्तोषजनक जूगु धासें सुभाय् देछानादिल ।
नेकपाया विवाद धुंका थ्वसिबें न्ह्यः नेकपाया दाहाल–नेपाल पुचलं अदालतय् तःगु मुद्धा विचाराधिन अवस्थाय् दूगु धासें निर्वाचनया तयारी मन्ह्याकेत आयोगयात इनाप याःगु खः ।
अथेहे प्रधानमन्त्रीलिसेया सहलहय् प्रमुख निर्वाचन आयुक्त थपलियां निर्वाचनया लागि माःगु बजेट, सुरक्षा व बन्दोबस्तीया ज्वलंया बारे न जानकारी बिउगु खः ।
सहलह ज्याझ्वलय् प्रमुख आयुक्त थपलियां नेकपाया आधिकारिकता विवादय् आयोगं माघ ११ गते यानागु निर्णय धुंका माघ २० गते आधिकारिकताय् मेगु निवेदन वःगु जानकारी नं बियादिल ।
प्रधानमन्त्री ओलीलिसें अर्थमन्त्री एवं नेकपा मू छ्याञ्जे बिष्णु पौडेल, नेता सुवास नेम्वाङ, कानुननमन्त्री लिलानाथ श्रेष्ठ कान्तिपथ झायादिगु खः ।
