खेलकुदलिसे प्रधानमन्त्री
पोहेलागा षष्ठी ११४१, माघ २१ बुधवाः
प्रधानमन्त्री केपी शर्मा ओलीं राष्ट्रिय खेलकुद परिषद्यात अन्तराष्ट्रिय खेलकुद धेंधेंबल्लाय् दुथ्याइपिं कासामि ल्यइबलय् पक्षधरता मयासें ल्ययेत छ्याता बियादीगु दु ।
राष्ट्रिय खेलकुद परिषदं येँय् याःगु खेलकुदलिसे प्रधानमन्त्री अन्तरक्रियास वयेकलं पक्षधरता मयासें प्रशिक्षक ल्ययेगु ज्या परिषदया जूगु व प्रशिक्षक लिसें कासाया नितिं कासामि ल्ययेय्बलय् लुँया तक्मायात जक प्राथमिकताय् तयेमाःगु धयादीगु खः । प्रधानमन्त्री ओलीं पदाधिकारी व छनौटकर्तायात तालिमनिसें कासा धेधेंबल्लातक्क कासामि ल्येय्गुलिइ भेदभाव मयायेत छु्याता बियादील ।
प्रधानमन्त्री ओलीं सरकारं खेलकुद क्षेत्रया लगानीयात बहुउत्पादनमुखी उपलब्धीया कथं कयाःगु स्पष्ट यानादील ।
खेलकुद क्षेत्र उत्पादक कि अनुत्पादक धका चर्चा जुइगु याःगु खँ उल्लेख यासें प्रधानमन्त्रीं कासा त्याका तक्मा हइबलय् देय्या गौरव अप्वयेकिगु जूगुलिं कासा क्षेत्रया लगानी सितिं मवनिगु व अनुत्पादक मजुइगु स्पष्ट यानादील ।
वयेकलं नेपाःया भूगोल कथंया कासा उत्पादन याना धेंधेंबल्लाय् अज्यागु कासायात दुथ्याकेत परिषद्यात छ्याता बियादील ।
कोभिड १९ या ंसंक्रमणया जोखिम म्हो जुयावःगु धासें वयेकलं आः मेगु क्षेत्र थें हे खेलकुद क्षेत्र नं याकनं हे पुलांगु लयस लिहाँवइगु भलसा प्वंकादील ।
प्रधानमन्त्री ओलीं कासा क्षेत्रय् सरकारया न्ह्याबलय् हे ग्वहालिमिया भूमिका दइगु भलसा प्वंकादील । मूलपानी क्रिकेट रंगशाला अझं दयेकेज्या मजूगु खँय् धाःसा वयेकलं अनभिज्ञता प्रकट यानादील ।
Categorized in कासा