पोखराय् बन्दया विरोधय् ओली पक्षं पिकाल मोटरसाइकल जुलुस
पोहेलागा सप्तमी ११४१, माघ २२ बिहीवाः
प्रचण्ड–नेपाल पुचलं देय्यंक आमहड्तालया ज्याझ्वः न्ह्याकाच्वंगु दु । अथेहे पोखराय् नं थीथी थासय् सवारी ज्वलं पना आवागमनया् अवरोध थःगु आन्दोलन न्ह्याकाच्वंगु दु ।
तर थुकिया विरोधय् ओली पुचःया कार्यकर्तापिन्स प्रदर्शन याःगु दु । पोखराया पृथ्वीनारायण क्याम्पसपाखें मोटरसाइकल ¥याली याना उमिसं बन्दया विरोध याःगु खः ।
प्रदर्शनया झ्वलय् ओली पक्ष व बन्दकर्ता प्रचण्ड–नेपाल पक्षया ज्यासनामि दथुई भनाभन तकं जूगु दु ।
पृथ्वीनारायण क्याम्पसपाखें पिहाँवःगु मोटरसाइकल ¥याली सिम्पानी, हरिचोक, मालेपाटन, पृथ्वीचोक, विरौटा, न्यूरोड जुया पृथ्वीनारायण क्याम्पस हे थ्यंका क्वचाःगु खः ।
पृथ्वीचोकय् बन्दकर्ता व बन्द विरुद्ध जुलुस पिकापिं ओलीया ज्यासानामी दथुई म्हूतु वायेगु ज्या जूगु खः ।
ओली पुचःया विरोध जुलुस वनेधुंका प्रचण्ड–नेपाल पक्षं ओलीविरुद्ध नाराबाजी याःगु खः सा ओली पक्षपिन्सं नेपाः खुल्ला हे दु, केपी ओली जिन्दावाद धयागु नारा थ्वेकूगु खः ।
प्रहरीं उपि निगू पुचया दथूई ल्वापू मजुइकेत सुरक्षा बियाच्वंगु खः । प्रचण्ड–नेपाल पक्षं याःगु नेपाल बन्दं याना सर्वसाधारणपिन्स सास्ती नयेमाःगु धासें ओली पक्षं उकियो विरोध यानागु धाःगु दु ।
