२०७८ बैशाख १, बुधबार

नेपाल पुलिस क्लब रारा गोल्डकपया सेमिफाइनलय् थ्यंन

लहानान्युज | चिल्लागा नवमी ११४१,चैत्र २४ मंगलवाः

नेपाल पुलिस क्लब पोखराया न्ह्यानाच्वंगु १९ क्वःगु संस्करणया आहा रारा गोल्डकप फुटबलया सेमिफाइनल प्रवेश याःगु दु ।
 
पोखरा रंगशालाय् मंगलबाः जूगु लिपांगु क्वाटरफाइनल कासाय् थ्री स्टार क्लबयात ४–० गोल अन्तरं बुका पुलिस लिपांगु प्यंगु थासय् थ्यंगु खः । पुलिसयात त्याकेत बुद्ध बल तामाङं निगू गोल यात । अथेहे तेज तामाङ व सौजन राईं छगोल छगोल यात । 
 
मकवानपुरया बागमती गोल्डकप त्याका पोखरा थ्यंगु थ्री स्टारविरुद्ध पुलिसं कासाया २८गू मिनेटय् बुद्धया गोलपाखें न्ह्यने लात । वय्कलं तेजया फ्रिकिकय् वन टच गोल यात । पुलिसं निगूगु हाफय् थ्री स्टारविरुद्ध लगातार गोल यात ।
 
कासाया ६७गू मिनेटय् तेज तामाङं गोल याना पुलिस २–० न्ह्यने लात । वय्कलं नीर कुमार राईया पासयात छ्यला गोल यात । कासाया ७०गू मिनेटय् थ्री स्टारया कप्तान अनन्त तामाङ घाइते जुसें मैदानं पिहाँवन ।
 
वयक्या थासय् मिन धिमाल मैदान प्रवेश यात । कासाया ७३गू मिनेटय् सुमन लामाया पासय् बुद्धं थःगु हे कुतलय् निगूगु गोल याना पुलिसयात ३–०नां न्ह्यने लाकल ।
 
वयांलिपाः ८५गू मिनेटय् सौजनं गोल याना पुलिसयात ४–० नां त्यायेत ताःलात । 
 
Categorized in कासा