“ओलीया भाय् पुलाम्ह जुजुया थें हे ह्वास्स नवः” ; प्रचण्ड
डंगोल | पोहेलाथ्व सप्तमी ११४१, माघ ७ बुधवाः
नेपाल कम्युनिष्ट पार्टी नेकपाया दाहाल–नेपाल पु्चःया नायः पुष्पकमल दाहालं ओली सरकारया पलाः प्रतिनिधिसभा विघटन जक मजुसें संविधान, संघीय लोकतान्त्रिक गणतन्त्र व देय्यात दुर्घटनापाखे यंकेगु दुष्कर्मया सुरुवात जूगु टिप्पणी यानादीगु दु । प्रेस संगठन नेपालया निक्वःगु राष्ट्रिय मुनायात म्हिगः येँय् सम्बोधन यासें नायः दाहालं ओलीया भाय् पुलाम्ह जुजुया थें हे ह्वास्स नवःगु धयादील ।
वयेकलं जनताय् निहित सार्वभौमसत्तायात ओलीं हताः याःगु धासें प्रतिनिधिसभा विघटन याना देय्यात संविधानविहीनता व तानाशाहीया भूमरीइ यंकेत स्वःगु द्वप बियादील । नायः दाहालं प्रधानमन्त्री ओलीं थःगु भावुक व्यक्तित्वया लव काःसा नं थःपिन्सं मनंतुसा ओलीयात अगःलय् न्याकाबिइगु ख्याच्वः तकं बियादील ।
ओलीं विदेशी शक्तिया विरोध याना राष्ट्रवादया नारा तःसा नं उपिं हे विदेशीया लम्पसार जुया पार्टी ब्वथलेगु दुस्साहस याःगु धका ओलीया राष्ट्रवाद फूसुलूगु व सामन्ती राष्ट्रवाद जूगु वयेकया टिप्पणी दु ।
दाहाल–नेपाल पुचःया मेम्ह नायः माधवकुमार नेपालं प्रतिनिधिसभा विघटन याना ओलीं थःपिन्त कामचलाउ जूगु नालेगु वा प्रधानमन्त्रीपाखें राजीनामा बिइमाःगु धयादील ।
पद चूलाकेगु नितिं थःपिं व दाहालयात स्वाने दयेकुगु टिप्पणी यासें वयेकलं नेतातयेत जालझेल याइम्ह ओली मखूगु खँया प्वः जूगु द्वपं बियादील ।
नेकपाया दाहाल नेपाल पुचःया स्थायी कमिटी दुजः योगेश भट्टराईं ओलीप्रति ताके यासें पार्टी दुनेया हे निरङ्कुश महाराजायात खने मफूगु दुःखद जूगु धयादील ।
अलोकतान्त्रिक शासकतयेत क्वचायेकेगु मजिमगाः जूगु धासें उगु खँ वयेकलं संर्घषया माध्यमं जक संभव जूगु धयादील ।
ज्याझ्वस वरिष्ठ पत्रकार लिसें च्वमि नारायण वाग्लें प्रतिगमन, विकास व समृद्धिया खँय् जनतायात प्रष्ट याये फूसा जक ओलीया प्रतिगामी पलाः विरुद्ध बः बिइगु धयादील ।
Categorized in राजनीति
