प्रधामन्त्रीं राष्ट्रघात याःगु प्रमाणित यानाबि ः प्रचण्ड
पोहेलागा तृतीया ११४१, माघ १८ आइतवाः
नेकपाया दाहाल–नेपाल पुचःया नायः पुष्पकमल दाहालं संसद मजुसें केपी ओलीया सरकार विघटन जूगु जिकिर यानादीगु दु ।
म्हिगः धनगढीइ ग्वसाःग्वःगु विरोध सभायात सम्बोधन यासें वयेकलं सर्वोच्च अदालतय् विघटनया मुद्दा मदूगु जूसा संसद सतेगु खःं, ओलीयात कारबाही यायेगु खःं, धयादील ।
प्रचण्डं पलेसाया कथं सभामुखं मुँज्या सःतादीगु, ३ब्वय् निब्वं प्रधामन्त्रीं राष्ट्रघात याःगु प्रमाणित याये फइगु जिकि र तकं यानादील ।
वयेकलं केपी ओली पार्टीइ जक मजुसें सडकय् नं ३ब्वय् छब्वलय् जक जूगु दाबी यानादील । पार्टीइ कमजोर जूसा नं सडकय् बल्लागु दु धाइम्ह ओलीयात बुटवल, विराटनगर व धनगढीया सभां चिधकःम्ह सावित यानाबिउगु प्रचण्डया धापू खः ।
वयेकलं धनगढी वया फुर्ति याःम्ह ओलीयात थःगु थाय् क्यनाबिउगुलिइ समर्थकतयेत शुभाय् तकं बियादील ।
ओली थःपिन्सं हे पतनया लँपू ल्यःगु धासें प्रचण्डं थःगु हे बुद्धिं इतिहासय् कलंकया सिन्ह तिका ओलीं थःपिन्त खलनायक कथं स्थापित याःगु धयादील ।
ओलीं संसद् मन्त धका घोषणा याःसा नं संसद् विघटन मजूगु धासें प्रचण्डं छम्ह मनूखं मनंतुनेवं संसद् विघटन मजु्इगु जिकिर यानादील ।
प्रचण्डं पूर्वमाओवादीया नेतातये प्रति तँ प्वंकादील । धनगढीया हे नेता तकं दीम्ह उद्योग वाणिज्य तथा आपूर्ति मन्त्री लेखराज भट्टयात ताके यासें वयेकलं ‘दलालया नं दलाल’ जूगु छुमां बियादील ।
पुचःया नायः माधवकुमार नेपालं ओलीं चुनाव याका प्रजातन्त्र क्वात्तूकिइ धइगु भ्रमं मुक्त जुइत इनाप यानादील ।
ओली गबलें नं गणतन्त्रया पक्षय् मदूगु धका वयेकलं लोकतन्त्र सिधंसां गणतन्त्र क्वचासां ओलीयात छुं मतलब मदूगु धयादील । वयेकलं ओलीयात बियाच्वंगु सुद्र्यःया छुमां बियादील ।
ओलीं मेगु पार्टी नेकपा चायेका व उकिया बियाच्वंगु सुद्र्यःया चिं ज्वना बिदा जुइत्यंगु नपालया धापू खः । वयेकलं ओली स्यन धका आपालं चिउता मयायेत इनाप यासें गबलें हे मभिनिगिु टिप्पणी यानादील ।
